Mitropoliti i Kithirës nuk njeh Epifanin si kryehierark kanonik
Sipas ierarkut grek, hirotonia e Epifan Dumenkos konsiderohet si jokanonike, pasi u krye nga Filareti kur ky ndodhej nën shkarkim kanonik.
Çështja e Kishës Ortodokse të Ukrainës u rikthye në vëmendje pas deklaratave të Metropolitit të Kithirës dhe Antikithirës, Serafim, i cili shpalli hapur se nuk e njeh Epifan Dumenkon si kryehierark kanonik. Sipas eeod.gr, ierarku dha një intervistë të gjatë për gazetarin Iosif Papadopulos, ku shpjegoi bazat kanonike të kundërshtimit të tij.
Në deklaratën e tij, Mitropoliti kujtoi se gjatë mbledhjes së Hierarkisë në vitin 2019 u shprehën qëndrime pro dhe kundër, por sipas tij nuk u zhvillua asnjë votim i rregullt, as i fshehtë e as me ngritje dore. Ai theksoi se çdo vendim kërkonte votim kanonik dhe hodhi poshtë idenë e një vendimi të marrë «me brohoritje». Sipas Serafimit, hirotonia e Epifanit konsiderohet jokanonike, pasi u krye nga Filareti në kohën kur ky i fundit ndodhej nën shkarkim kanonik, duke iu referuar edhe qëndrimit të Kryepiskopit të Shqipërisë, Anastas, mbi çështjen e hirotonive, dorëzimeve.
I pyetur nëse qëndrimi i tij përafrohet me atë të Patriarkanës së Moskës, Serafimi u përgjigj mohueshëm. Ai sqaroi se kundërshtitë e tij lidhen ekskluzivisht me mënyrën e dhënies së autoqefalisë dhe me kanonicitetin e personave të njohur, jo me çështje gjeopolitike më të gjera. Mitropoliti theksoi gjithashtu se roli i një episkopi nuk janë risitë, por ruajtja e traditës kishtare.
Më parë, Mitropoliti i Kithirës kishte dënuar përndjekjen e besimtarëve të Kishës kanonike të Ukrainës, duke kërkuar atëherë ndërprerjen e menjëhershme të dhunës ndaj klerikëve dhe besimtarëve.
Intervista prek edhe tema të tjera, si qëndrimi i tij ndaj masave shtetërore gjatë pandemisë, kur vazhdoi liturgjitë pavarësisht ndalimeve dhe u gjykua e u shpall i pafajshëm në Pire, si dhe pozicioni i tij kundër martesave të çifteve të të njëjtit seks. Mitropoliti mbylli bisedën me një referencë të veçantë ndaj shenjtërisë së ikonës të së Tërëshenjtës Mirtidiotissa, panairi më i madh fetar i ishullit të Kithirës.
