Shën Mihail Omologjiti, episkopi që mbrojti ikonat e shenjta
Episkopi i Sinadës u dallua për besimin e tij të palëkundur, për kujdesin ndaj të varfërve dhe për qëndresën kundër persekutimit ikonoklast.
Shën Mihail Omologjiti, episkop i Sinadës, jetoi në kohën e perandorit Leon Armenit, rreth vitit 814 pas Krishtit.
Ai ishte biri i vetëm i prindërve të pasur dhe vinte nga Sinada e Frigjisë. Që në rini u formua me kujdes në dijet teologjike dhe më pas shkoi në Konstandinopojë. Atje u lidh shpirtërisht me një njeri të shenjtë, Theofilaktin.
Të dy së bashku u vendosën në një manastir pranë Detit të Zi, të themeluar nga Patriarku Taras. Patriarku, duke parë ndriçimin hyjnor dhe jetën e shenjtë të dy burrave, i dorëzoi priftërinj.
Më vonë, Theofilaktin e vendosi episkop të Nikomedisë, ndërsa Mihailin episkop të Sinadës. Në këtë shërbesë të re, Shën Mihaili shkëlqeu shpirtërisht si një qytet i ndritshëm i vendosur mbi mal.
Ai ishte mbrojtës i fortë i besimit orthodhoks dhe predikonte rregullisht fjalën e Perëndisë. Me vigjilencë baritore ruante dogmën e drejtë nga mësimet heretike dhe u dallua për dashurinë e tij ndaj njerëzve, duke ndihmuar të varfrit dhe të sëmurët e grigjës së tij.
Kur perandori Leon Armeni nisi persekutimin kundër ikonave të shenjta, Shën Mihaili u ngrit me guxim kundër kësaj veprimtarie të padrejtë. Ai nuk pranoi të heshtte përpara sulmit ndaj traditës së shenjtë të Kishës dhe mbrojti me qëndrueshmëri nderimin e ikonave.
Për këtë arsye, perandori e burgosi në një fortesë të quajtur Evdokia. Por edhe atje, Shën Mihaili nuk pushoi së mësuari të vërtetën. Prandaj e transferuan nga një burg në tjetrin, duke e munduar me vuajtje dhe privime të shumta.
Në fund, i lodhur nga torturat dhe mundimet, ai ia dorëzoi shpirtin Zotit si “ushtar i mirë i Jisu Krishtit”.
Kisha e nderon Shën Mihailin si omologjit, sepse ai dëshmoi me guxim besimin e drejtë në kohë përndjekjeje. Kujtimi i tij na kujton se e vërteta e Kishës nuk mbrohet vetëm me fjalë, por edhe me qëndresë, sakrificë dhe besnikëri deri në fund.
Koka e shenjtë e Shën Mihailit ruhet si thesar në Manastirin e Madh të Lavrës në Malin e Shenjtë, ku u dorëzua me krisobul nga perandorët Vasili dhe Kostandin.
