U kremtua Dita e Shpirtit të Shenjtë në Tiranë

Në Katedralen “Ngjallja e Krishtit” në Tiranë u kremtua sot Dita e Shpirtit të Tërëshenjtë, e cila përkoi me 12-vjetorin e shenjtërimit të katedrales.

Kjo përvjetor lidhet me një nga ngjarjet më të rëndësishme të ringritjes së Kishës Orthodhokse Autoqefale të Shqipërisë pas periudhës së gjatë të përndjekjes ateiste.

Shërbesat e shenjta u drejtuan nga Episkopi i Amantias, Hirësia e Tij Imzot Ignati. Në lutje mori pjesë edhe Fortlumturia e Tij, Kryepiskopi i Tiranës, Durrësit dhe i Gjithë Shqipërisë, Imzot Joani, së bashku me klerikë dhe besimtarë.

Në fjalën e tij, Episkopi Ignat u ndal te rëndësia e Ditës së Shpirtit të Shenjtë. Ai theksoi se Pentikostia shënon fillimin e misionit apostolik të Kishës, kur Shpirti i Shenjtë zbriti mbi Apostujt dhe i fuqizoi ata për të përhapur Ungjillin në mbarë botën.

Sipas tij, Shpirti i Shenjtë është dhuruesi i jetës, Ngushëllimtari dhe fuqia që udhëheq Kishën në çdo kohë. Ashtu si Apostujt u mbushën me guxim pas zbritjes së Tij, edhe besimtarët sot janë të thirrur ta dëshmojnë besimin me vendosmëri dhe dashuri.

Duke iu referuar përvjetorit të shenjtërimit të katedrales, Hirësia e Tij kujtoi veprën e paharruar të Kryepiskopit të ndjerë Anastas, të cilin e cilësoi si arkitektin e ringjalljes së Kishës në Shqipëri.

Ai theksoi se Katedralja “Ngjallja e Krishtit” është fryt i një vizioni të madh, i lutjeve dhe i një pune të jashtëzakonshme. Ajo nuk është vetëm qendra shpirtërore e besimtarëve orthodhoksë në Shqipëri, por edhe një derë e hapur për të gjithë njerëzit.

Në vijim, Episkopi Ignat nënvizoi nevojën e pranisë së Shpirtit të Shenjtë në jetën e çdo të krishteri. Ashtu si frymëmarrja është e domosdoshme për jetën fizike, edhe hiri i Shpirtit të Shenjtë është i domosdoshëm për jetën shpirtërore.

Kremtimi përkoi gjithashtu me kujtimin e Dëshmor Justin Filozofit, një prej apologjetëve më të njohur të krishterimit të hershëm. Me jetën dhe dëshminë e tij, ai tregoi se kërkimi i së vërtetës dhe besnikëria ndaj Krishtit e udhëheqin njeriun drejt shenjtërimit.

Në përfundim, Hirësia e Tij Ignati ftoi besimtarët të mbeten mirënjohës ndaj Perëndisë dhe ndaj të gjithë atyre që kontribuuan në ndërtimin dhe zhvillimin e Kishës, duke u lutur që hiri i Shpirtit të Tërëshenjtë të mbushë zemrat e të gjithëve me paqe, forcë dhe gëzim shpirtëror.

Burimi: Radio Ngjallja.

Foto: Radio Ngjallja / Kisha Orthodhokse Autoqefale e Shqipërisë

Kremtimi i Ditës së Shpirtit të Shenjtë dhe 12-vjetorit të shenjtërimit të Katedrales “Ngjallja e Krishtit” në Tiranë.