Kryepiskopi Joan uroi Kurban Bajramin

Fortlumturia e Tij, Imzot Joani, Kryepiskop i Tiranës, Durrësit dhe i gjithë Shqipërisë, zhvilloi vizita urimi me rastin e Kurban Bajramit.

Kryepiskopi Joan vizitoi në selinë e tij Kryetarin e Komunitetit Mysliman të Shqipërisë, H. Bujar Spahiu, të cilit i përcolli urimet për festën.

Më pas, Fortlumturia e Tij vizitoi edhe Kryegjyshin Botëror Bektashian, Shkëlqesinë e Tij Haxhi Dede Edmond Brahimaj, duke uruar besimtarët bektashinj për këtë ditë të rëndësishme.

Vizitat u zhvilluan në një frymë respekti dhe bashkëjetese ndërfetare, një vlerë e njohur e shoqërisë shqiptare. Ato dëshmojnë rëndësinë e marrëdhënieve të mira midis komuniteteve fetare në vend dhe rolin e tyre në ruajtjen e paqes, dialogut dhe mirëkuptimit.

Në Shqipëri, urimet ndërfetare në ditët e festave të mëdha janë bërë pjesë e një tradite të qëndrueshme. Kjo traditë shpreh respektin reciprok dhe dëshirën për të ndërtuar ura bashkëpunimi në shërbim të njerëzve dhe të shoqërisë.

Burimi dhe fotot KOASH