Një vizitë me shumë kuptim dhe ndjeshmëri
Të ndryshëm por të barabartë
Në kuadër të Ditës Botërore të Autizmit, një grup nxënësish nga Kolegji “Frymë Dashurie” zhvilloi një vizitë në Qendrën e Zhvillimit në Sarandë.
Vizita u shndërrua në një përvojë me vlerë të veçantë edukative dhe sociale, duke ofruar një pasqyrë të drejtpërdrejtë mbi realitetin e personave me autizëm. Nxënësit patën mundësinë të kuptojnë se autizmi nuk përbën pengesë, por një mënyrë të veçantë të perceptimit të botës, të karakterizuar nga sinqeriteti, ndjeshmëria dhe potenciali unik.
Gjatë qëndrimit, u vu në dukje puna e përkushtuar e stafit të Qendrës së Zhvillimit, i cili kontribuon në mënyrë të vazhdueshme për mbështetjen dhe zhvillimin e fëmijëve, duke krijuar një ambient të sigurt dhe gjithëpërfshirës.
Kolegji “Frymë Dashurie” shpreh mirënjohjen e tij për mikpritjen dhe bashkëpunimin, duke theksuar rëndësinë e nismave të tilla në formimin e një brezi të ri që respekton dhe promovon diversitetin.
Nisma të tilla përforcojnë mesazhin për ndërtimin e një shoqërie gjithëpërfshirëse, ku çdo fëmijë ka mundësinë të zhvillohet dhe të kontribuojë sipas aftësive të tij.
Kolegji "Frymë Dashurie"- Κολλέγιο "Πνοή Αγάπης"
