Oshënari Theofan i Mbylluri – episkopi që zgjodhi qelinë
Gjergj Vasiljeviç Govorov, i njohur si Theofan i Mbylluri, kaloi 28 vitet e fundit të jetës i vetmuar në shkretëtirën e Vishenskut, duke u bërë një nga shkrimtarët shpirtërorë më të rëndësishëm të Kishës Ortodokse Ruse.
Oshënari Theofan i Mbylluri – me emrin e tij në botë Gjergj Vasiljeviç Govorov – është një nga figurat më të shquara shpirtërore të ortodoksisë ruse të shekullit XIX. Sipas Sinaksarit, ai lindi më 10 janar 1815 në fshatin Çernafska, në eparkinë e Orllovit, nga një baba prift.
Govorov kreu studimet e para në Seminarin e Orllovit (1831–1837), pastaj iu soll Akademisë Teologjike të Kievit, ku diplomoi në vitin 1841. Atë vit u dorëzua dhjak dhe pas pak muajsh mori edhe urdhrin e priftërisë. Për vite me radhë u morr me formimin e tij, duke studiuar Etikën, Filozofinë, Psikologjinë, Logjikën dhe Latinishten në shkolla e akademi të ndryshme.
Në vitin 1847 ndërmori një udhëtim të rëndësishëm në Ballkan, ku studioi për shtatë vjet jetën dhe traditën e murgërisë greko-orthodhokse. Kjo periudhë do të linte gjurmë të thella në formimin e tij shpirtëror. Pasi u kthye, në vitin 1857, u emërua rektor i Akademisë Teologjike të Shën Petërsburgut.
Në vitin 1859 u dorëzua episkop i eparkisë së Tambovit dhe më pas mori drejtimin e eparkisë së Vladimirit. Por pas 25 vjetësh shërbimi të gjerë kishtar, në vitin 1866 mori një vendim të pazakontë: e la shërbimin e tij si episkop dhe u tërhoq në një qeli të thjeshtë në shkretëtirën e Vishenskut. Atje do të jetonte i mbyllur për 28 vjet, deri në vdekje.
Theofan i Mbylluri la një trashëgimi letrare të pasur, që ndahet në tri grupe: vepra morale, shpjeguese dhe përkthime. Shkrimet e tij janë konsideruar klasike të literaturës asketike orthodhokse. Ai ndërroi jetë në vitin 1894. Kisha Ortodokse Ruse e shpalli shenjt pas rreth një shekulli nga vdekja e tij.
