Vijojnë punimet për restaurimin e Manastirit të Kryeengjëjve në Derviçan
Ndërhyrjet përfshijnë konakët lindorë e perëndimorë të kompleksit, ndërsa kisha është shpallur Monument Kulture i kategorisë së parë.
Manastiri i Kryeengjëjve në Derviçan është një nga 15 manastiret që dëshmojnë pasurinë e rrallë shpirtërore e kulturore të Qarkut të Gjirokastrës. Ministri Blendi Gonxhja shkoi për të parë nga afër se si vijojnë punimet për restaurimin dhe rijetëzimin e kompleksit.
Ndërhyrjet kryhen në konakët lindorë e perëndimorë, me qëllim që t'u rikthehet funksioni pas dekadash degradimi. Faza e parë parashikon ringritjen, restaurimin dhe konservimin e konakëve përmes konsolidimit të muraturave.
Kisha e manastirit është shpallur tashmë "Monument Kulture" i kategorisë së parë. Këto ndërhyrje i japin një të ardhme të re këtij kompleksi historik.
Kompleksi synohet të bëhet hapësirë e gjallë për komunitetin dhe pikë referimi për vizitorët e turizmin kulturor në Dropull.
Nuk është hera e parë që vëmendja ra mbi trashëgiminë kishtare të Dropullit; kohët e fundit UGO shkroi për Manastirin e Shën Qirjakut, që ruan trashëgiminë kishtare në Dropull.
