Mitropoliti Nikolla kremtoi 20-vjetorin e kryepriftërisë
Në Katedralen e Shën Gjergjit u dorëzua dhjakon katekisti Dhimitër Kapaj, ndërsa At Niko Bregu u nderua me titullin Ikonom-Stavrofor.
Mitropoliti i Apollonisë dhe Fierit, Imzot Nikolla, kremtoi të Dielën e 9-të të Llukait 20-vjetorin e dorëzimit në gradën e Kryepriftërisë. Sipas njoftimit të Mitropolisë së Shenjtë të Apollonisë dhe Fierit, kremtimi u zhvillua në Katedralen e Shën Gjergjit.
Shërbesat e Mëngjesores dhe të Liturgjisë Hyjnore i kryesoi Imzot Nikolla, në bashkëmeshim me klerikët e Mitropolisë. Një moment i veçantë i ditës ishte hirotonia në gradën e Dhjakonit e katekistit Dhimitër Kapaj, që nis kështu një shërbesë të re kishtare. Kleriku At Niko Bregu u nderua me titullin Ikonom-Stavrofor, në shenjë vlerësimi për shërbesën e tij në Kishë.
Hierodhjakon Dhimitri ka shërbyer prej nëntë vitesh në Kishën Orthodhokse. Në vitin 2025 përfundoi studimet në Kolegjin Universitar "Logos", në degën Teologji Sociale dhe Shkenca Religjioze. Pas studimeve vijoi shërbesën si katekist dhe më pas mori detyrën e përgjegjësit të katekizmit në Mitropolinë e Shenjtë të Apollonisë dhe Fierit.
Në njoftim shprehet lutja që Perëndia ta forcojë, ta ndriçojë dhe ta udhëheqë Hierodhjakon Dhimitrin në shërbesën e re, duke i dhënë hir, urtësi dhe përkushtim.
UGO kishte raportuar mbi predikimin e Mitropolitit Nikolla për Samaritanin e mirë në Fier pak ditë më parë.
