Vijojnë punimet për rindërtimin e konakut të Manastirit në Dhuvjan
Punimet financohen nga World Monuments Fund dhe zbatohen nga Cultural Heritage without Borders, me mbështetjen e institucioneve shtetërore të kulturës.
Punimet për rindërtimin e konakut të Manastirit të Shën Qirjakut dhe Julitës në Dhuvjan vijojnë. Sipas DRTK Gjirokastër, ndërhyrja synon ruajtjen dhe rijetëzimin e kësaj pasurie të trashëgimisë kulturore, historike dhe shpirtërore.
Punimet po realizohen me financimin e World Monuments Fund (WMF). Zbatimi i tyre i është besuar Cultural Heritage without Borders (CHwB).
Mbështetje i japin Drejtoria Rajonale e Trashëgimisë Kulturore (DRTK), Instituti Kombëtar i Trashëgimisë Kulturore (IKTK) dhe Ministria e Turizmit, Kulturës dhe Sportit. Ndërhyrja cilësohet e rëndësishme për ruajtjen e kësaj vlere të trashëgimisë.
Nuk është hera e parë që vëmendja ndaj objekteve kishtare në zonën e Gjirokastrës përqendrohet te restaurimi; kohët e fundit u raportua edhe për punimet për restaurimin e Manastirit të Kryeengjëjve në Derviçan.
