Kori bizantin shqiptar “Shën Joan Kukuzeli” psalmodon në panairin e Bigorskit
Kori nën drejtimin e Theodhor Pecit psalmoi në kremtimet për Prerjen e Kokës së Shën Joan Pararendësit në Maqedoninë e Veriut.
Kori Bizantin i Psaltëve “Shën Joan Kukuzeli” mori pjesë në kremtimet e panairit të Manastirit të Bigorskit, në Maqedoninë e Veriut, me bekimin e Kryepiskopit të Tiranës, Durrësit dhe të Gjithë Shqipërisë, Imzot Joanit. Sipas njoftimit të School of Byzantine Music in Albania, pjesëmarrja u bë me ftesë zyrtare të Igumenit të Manastirit, Imzot Parthenit.
Kori shqiptar, nën drejtimin e Theodhor Pecit, u vu në rrugëtim drejt Bigorskit me rastin e kremtes së Prerjes së Kokës së Nderuar të Shën Joan Pararendësit dhe Pagëzorit. Shërbesat u kryesuan nga Mitropoliti i Dibrës dhe Kërçovës, Imzot Gjeorgji. Gjatë ceremonive, kori shqiptar psalmoi në gjuhën shqipe në psaltirin e majtë, ndërsa kori i etërve të Manastirit të Bigorskit u vendos në psaltirin tjetër, duke krijuar një bashkëpsalmodi të dy koreve në frymën e traditës psaltike bizantine dhe liturgjike orthodhokse.
Prania e Korit Bizantin “Shën Joan Kukuzeli” në këto kremtime përbën një dëshmi të rëndësishme të traditës psaltike shqiptare në jetën liturgjike orthodhokse. Bashkëpsalmodia mes dy koreve u përshkrua si shprehje konkrete e unitetit në besim dhe e dashurisë vëllazërore ndërmjet Kishave dhe popujve orthodhoksë të rajonit.
Nuk është hera e parë që bashkëpunimi ndërkishtar rajonal vihet në qendër të vëmendjes; kohët e fundit UGO kishte raportuar edhe mbi restaurimin e Kishës së Shën Mërisë dhe Manastirit të Shën Prodhromit në Voskopojë, si pjesë e kujdesit të vazhdueshëm për jetën monastike dhe liturgjike orthodhokse në rajon.
