Ish-inxhinier japonez i hapësirës u bë murg në Malin Athos
Pas viteve në protestantizëm dhe një jetë shpirtërore në kërkim, ai gjeti prehje në Manastirin e Ivironit, ku kujdeset për ikonën e Shën Marisë Portaitissa.
Mali Athos ka bërë të njohur një histori të veçantë jete: një ish-inxhinier japonez i hapësirës që sot jeton si murg në një prej manastireve më të lashta të gadishullit të shenjtë. Sipas enimerotiko.gr, protagonist i historisë është Takajuki Kozaki, sot i njohur si atë Timotheos, i cili në rininë e tij studioi inxhinieri hapësinore dhe arkitekturë detare në Tokio.
Ai u lind dhe u rrit në periferitë lindore të Tokios dhe punoi në profesione të ndryshme, nga kamerier e mësues në kurse private, deri te hidraulik dhe pastrues pishinash. Në moshën 27-vjeçare, një njohje e rastësishme me një grup të rinjsh protestantë në Japoni i hapi rrugën drejt krishterimit. Brenda gjashtë muajve u pagëzua i krishterë, ndërsa më vonë, pas një dekade jete si protestant në Tokio, ndjeu se diçka i mungonte shpirtërisht dhe u drejtua drejt Ortodoksisë.
Vendimi për të lënë Japoninë e çoi fillimisht në Kaliforni, në manastirin e Shën Joan të Shangait. Ai shërbeu më pas në komunitete në Alaska, njohu plakun Efraim në Arizona, jetoi pranë tij për tre vjet dhe u gjend më vonë në Kore. Kur komuniteti atje filloi të tkurret, episkopi i tij e nxiti të shkonte në Malin Athos, ku Manastiri i Ivironit e preku thellë, kryesisht për shkak të ikonës mrekullibërëse të Shën Marisë Portaitissa.
Sot, atë Timotheos është përgjegjës për ruajtjen e kishëzës ku ndodhet ikona e shenjtë, pret pelegrinët, i udhëheq dhe u flet për Shën Marinë me thjeshtësi. Paralelisht, ai merret edhe me qëndismën e manastirit, një art që e mësoi nga nëna e tij në Japoni. «Nëna ime thoshte se për të krijuar një familje duhet të dish të gatuash, të pastrosh, të qëndisësh. Këto njohuri sot më ndihmojnë të shërbej vëllazërinë», tregon i prekur murgu.
Më parë, lipsanet e Shën Anës mbërritën për herë të parë nga Mali Athos në Rumani, një ngjarje tjetër që solli vëmendje mbi shenjtëritë e ruajtura në gadishullin e shenjtë të Athosit.
