Liturgjia e parë hyjnore u kremtua për shqiptarët orthodhoksë në Kanada
Komuniteti Orthodhoks Shqiptar në Kanada njoftoi se më 9 gusht u kremtua Liturgjia e parë Hyjnore nga Bishop Nikodhim, me pjesëmarrjen e besimtarëve.
Komuniteti orthodhoks shqiptar në Kanada njoftoi kremtimin e Liturgjisë së parë Hyjnore për besimtarët e tij. Sipas njoftimit të Komunitetit Orthodhoks Shqiptar në Kanada në Facebook, shërbesa u krye më 9 gusht 2026 nga Hirësia e Tij, Peshkop Nikodhim.
Në njoftim kjo ditë përshkruhet si një çast i veçantë për komunitetin, i cili u mblodh për lutje të përbashkët dhe për pjesëmarrje në Liturgji. Po ashtu u theksua se, megjithëse pritej një pjesëmarrje më e gjerë, besimtarët e pranishëm e përjetuan takimin si një fillim të rëndësishëm për jetën kishtare të bashkësisë.
Komuniteti falënderoi veçanërisht Peshkop Nikodhimin dhe Atë Mark Doku për mundësimin e kësaj Liturgjie. Një falënderim iu drejtua edhe pjesëmarrësve që qëndruan pas shërbesës për kafe, bisedë vëllazërore dhe mbështetje me kontribute për komunitetin.
Në mesazhin e publikuar, komuniteti shprehu shpresën që kjo të jetë vetëm e para nga shumë Liturgji që do të kremtohen së bashku në të ardhmen. Gjithashtu u përmend lutja që, me ndihmën e Zotit, bashkësia të ketë në vijim kishën dhe priftin e vet.
Njoftimi e mbyll këtë ngjarje me thirrjen për të ruajtur bashkimin, dëshirën për jetën kishtare dhe dashurinë për besimin orthodhoks, të lidhur ngushtë me trashëgiminë shqiptare të besimtarëve në Kanada.
UGO kishte raportuar më parë për zhvillime të tjera kishtare që lidhen me Kanadanë.
