Mitropoliti i Pireut kritikon Papën Leon për zbutjen e mëkateve seksuale
Sipas mitropolitit grek, qëndrimi i ri i papës për moralin nxit entuziazëm te përkrahësit e agjendës "woke" dhe largon Vatikanin nga traditat patristike.
1
Mitropoliti i Pireut, Serafim, kritikoi deklaratat e fundit të «Papës» Leon, duke theksuar se ai po ul rëndësinë e mëkateve seksuale në kurriz të çështjeve shoqërore. Sipas portalit fetar grek EEOD.gr, hierarku ortodoks e lidhi këtë qëndrim me largimin gradual të papizmit nga traditat patristike.
Në deklaratën e tij, hierarku theksoi se zbulimet e dekadave të fundit për abuzimin seksual të mijëra fëmijëve nga kleri katolik goditën rëndë autoritetin e Vatikanit, i cili i mbuloi këto krime për vite me radhë. Ai kritikoi artikullin «Papa Leon: Morali seksual nuk është më prioritet», duke thënë se qëndrimi i ri i papës gëzoi përkrahësit e «Agjendës Woke», që synon shkëputjen e plotë të shoqërisë nga vlerat e krishtera.
Mitropoliti shtoi se «e fundit gjë që i duhet botës së sotme apostatike është zbutja e pjesshme e mëkatit», duke e cilësuar këtë si provë të mëtejshme që Vatikani po ndjek Agjendën Woke. Sipas tij, Kisha Ortodokse çmon drejtësinë dhe solidaritetin shoqëror, por nuk i shkëput këto nga jeta shpirtërore dhe pendimi, pasi shpëtimi nuk kufizohet te përmirësimi i strukturave shoqërore, por kërkon shndërrimin e njeriut me anë të Hirit të Perëndisë. Ai kujtoi edhe fjalët e Krishtit: «Lum ata që kanë zemër të pastër, sepse ata do të shohin Perëndinë».
Nuk është hera e parë që Mitropoliti i Pireut ngre alarmin për largimin e Kishës Katolike nga traditat e lashta; kohët e fundit ai kishte kritikuar edhe zhvillimet e një forumi katolik në Würzburg.
Më parë, EEOD.gr kishte raportuar edhe për një informim tjetër të Mitropolitit të Pireut, drejtuar besimtarëve rreth fenomenit të neo-shamanizmit.
