Mitropolia e Gjirokastrës kremton martirët Kirik dhe Julita në Dropull
Shërbesa u zhvillua në kujtim të martirëve, ku u krye edhe litania e ikonës dhe Lipsanit të Shën Julitës në oborrin e manastirit.
Në Manastirin e Lindjes së Hyjlindëses në fshatin Dhuvjan të Dropullit u zhvillua sot Shërbesa e Mëngjesores dhe Liturgjia Hyjnore, në kujtim të Martirëve të Shenjtë Kiriku dhe Julita. Sipas njoftimit të Mitropolisë së Gjirokastrës, shërbesat u drejtuan nga Mitropoliti i Gjirokastrës, z. Nathanail.
Në ceremoni morën pjesë klerikë dhe besimtarë të zonës, të cilët u mblodhën për të nderuar kujtimin e dy martirëve dhe për të marrë pjesë në Misterin e Eukaristisë Hyjnore. Gjatë predikimit, Mitropoliti Nathanail u ndal te shembulli i besimit, guximit dhe dashurisë së palëkundur ndaj Krishtit që dëshmuan Shën Kiriku dhe nëna e tij, Shën Julita, duke theksuar se dëshmia e tyre mbetet një thirrje e përhershme për çdo të krishterë që të jetojë me besnikëri Ungjillin.
Në përfundim të Liturgjisë Hyjnore u zhvillua edhe litania e ikonës dhe Lipsanit të Shën Julitës, si dhe Shërbesa e Pesë Bukëve në oborrin e Manastirit. Sipas njoftimit, edhe pse Manastiri i kushtohet Hyjlindëses Mari, është bërë traditë që besimtarët të mblidhen këtë ditë, pasi në këtë manastir, deri në vitet e regjimit komunist, ndodhej Lipsani i shenjtorëve.
Nuk është hera e parë që Mitropoliti Nathanail kryeson kremtime të tilla në rrethin e Gjirokastrës; kohët e fundit vëmendja ra edhe mbi vizitat e tij në bashkësitë e Dropullit.
