Në Berat u kremtua Mbrëmësorja e Shën Nikodhimit

Në Kishën e Shën Mëhillit në Berat u kremtua Mbrëmësorja e Shën Nikodhimit, dëshmorit të ri që lidhet ngushtë me këtë qytet dhe me kujtesën e krishterë të krahinës.

Shërbesa u drejtua nga Mitropoliti i Beratit, Vlorës dhe Kaninës, Hirësia e Tij Imzot Asti, me pjesëmarrjen e klerikëve dhe besimtarëve.

Gjatë Mbrëmësores u krye edhe litania e lipsanit të shenjtë të Shën Nikodhimit. Besimtarët patën mundësinë të nderonin me përkushtim shenjtorin, i cili me pendimin dhe martirizimin e tij u bë dëshmi e gjallë e fuqisë së mëshirës së Perëndisë.

Shën Nikodhimi lindi në Vithkuq të Korçës, nga prindër shpresëtarë. Më vonë u vendos në Berat, ku punonte si rrobaqepës. Pas një periudhe të dhimbshme largimi nga besimi, ai erdhi në pendim në Malin e Shenjtë dhe u qeth murg me emrin Nikodhim.

Pas viteve të kreshmës, lotëve dhe pendimit, ai u kthye në Berat për të rrëfyer Krishtin përpara njerëzve. Atje u kap, u torturua dhe, duke qëndruar i palëkundur në besim, pranoi martirizimin.

Kujtimi i Shën Nikodhimit ka rëndësi të veçantë për Beratin. Sipas traditës, qëndresa e tij ndikoi edhe te banorët e zonës së Shpiragut, të cilët, pasi panë heroizmin e dëshmorit, u forcuan në besimin e krishterë.

Mbrëmësorja në Kishën e Shën Mëhillit ishte një rast lutjeje, përkujtimi dhe nderimi për këtë shenjtor të pendimit, kthimit dhe dëshmisë së guximshme për Krishtin.

Shën Nikodhimi u kujton besimtarëve se asnjë rënie nuk është më e madhe se mëshira e Perëndisë, kur njeriu kthehet me pendim të sinqertë dhe me besnikëri ndaj Krishtit.

Teksti UGO.

Burimi i fotove Mitropolia e Shenjtë e Beratit.