OKB: grup shtetesh kërkojnë moratorium global ndaj amësisë surrogate
Deklarata u paraqit më 22 qershor në Këshillin e OKB-së për të Drejtat e Njeriut, mbështetur nga Italia, Kili, Kameruni dhe Selia e Shenjtë.
Surrogacia po kthehet sërish në qendër të debatit ndërkombëtar, pasi një grup shtetesh në Organizatën e Kombeve të Bashkuara ka paraqitur një deklaratë politike që kërkon moratorium global ndaj kësaj praktike. Sipas The European Conservative, dokumenti u prezantua më 22 qershor, në kuadër të sesionit të 62-të të Këshillit të OKB-së për të Drejtat e Njeriut.
Nisma është udhëhequr nga Italia dhe Kili, ndërsa organizatorë të eventit kanë qenë gjithashtu Kameruni dhe Selia e Shenjtë, me organizatën ADF International si moderatore. Deklarata nuk ka fuqi ligjore detyruese dhe nuk i detyron shtetet të ndryshojnë legjislacionin e tyre, por mbështetësit e saj e shohin atë si hapin e parë drejt një marrëveshjeje ndërkombëtare kundër amësisë surrogate. Në tekstin e dokumentit theksohet se kjo praktikë shoqërohet me rreziqe serioze për gratë dhe fëmijët, duke përfshirë dëmtime shëndetësore, detyrim, humbje autonomie, pasoja psikologjike, pasiguri juridike, trafikim qeniesh njerëzore dhe shfrytëzim.
[[read_also:???]]
Përkrahësit e moratoriumit argumentojnë se ndalimet kombëtare nuk mjaftojnë më, pasi surrogacia është shndërruar në një treg ndërkufitar. Sipas tyre, vendet me legjislacion kufizues në fakt e zhvendosin kërkesën drejt juridiksioneve ku gratë janë më të cenueshme, ndërsa mbrojtja juridike është më e dobët. Kjo, thonë ata, e bën çështjen një problem me përmasa globale që kërkon një përgjigje të koordinuar ndërkombëtare.
Më parë, siç kishte raportuar edhe SPZH, në OKB është përcaktuar koncepti i gjinisë i ndarë nga seksi biologjik, çështje që mbetet pjesë e të njëjtit debat më të gjerë mbi të drejtat riprodhuese dhe familjen. [[read_also:???]]
