Mitropoliti Onufri: Skizma në Ukrainë mbetet plagë e hapur

Primati i Kishës Orthodhokse të Ukrainës, Mitropoliti i Kievit dhe i gjithë Ukrainës, Fortlumturia e Tij Onufri, komentoi ndarjen nga jeta të Filaret Denisenkos, një prej figurave më të diskutuara të historisë kishtare bashkëkohore në Ukrainë.

Në një intervistë të publikuar më 15 maj 2026, Mitropoliti Onufri u shpreh se Kisha shpresoi deri në fund për pendimin e Filaretit, por kjo, sipas tij, nuk ndodhi. Duke folur për pasojat e veprimtarisë së tij kishtare, ai e quajti skizmën në Ukrainë “një plagë që ende gjakos” në jetën kishtare të vendit.

Megjithatë, në fjalën e tij, Mitropoliti Onufri nuk u ndal vetëm te dhimbja e përçarjes. Ai theksoi se, tani që Zoti e thirri Filaretin në përjetësi, ai i besohet mëshirës hyjnore. Kjo qasje e vendos ngjarjen në një plan më të gjerë shpirtëror: gjykimi përfundimtar i njeriut i përket vetëm Perëndisë, ndërsa Kisha mbetet e thirrur të ruajë të vërtetën dhe, njëkohësisht, të lutet për mëshirë.

Filaret Denisenko u nda nga jeta në moshën 97-vjeçare. Lajmi për vdekjen e tij u bë i njohur në mars 2026, pasi më herët ishte njoftuar edhe për përkeqësimin e gjendjes së tij shëndetësore dhe shtrimin në një institucion mjekësor në Kiev.

Figura e Filaretit mbetet e lidhur ngushtë me zhvillimet e trazuar të Orthodhoksisë në Ukrainë pas rënies së Bashkimit Sovjetik. Ai kishte qenë një nga hierarkët më të rëndësishëm të Kishës Ruse në Ukrainë, por pas pavarësisë së Ukrainës u bë drejtues i lëvizjes për një strukturë kishtare të pavarur nga Moska. Kjo solli krijimin e Patriarkanës së Kievit, e cila për dekada qëndroi jashtë njohjes kanonike të pjesës më të madhe të botës orthodhokse.

Në vitin 2018, struktura që ai drejtonte mori pjesë në bashkimin që çoi në krijimin e Kishës Orthodhokse të Ukrainës, e njohur më pas nga Patriarkana Ekumenike në vitin 2019. Megjithatë, marrëdhëniet e Filaretit me drejtimin e ri të kësaj strukture u përkeqësuan shpejt, dhe ai u përpoq të ringjallte Patriarkanën e Kievit, duke hyrë sërish në një përplasje të brendshme kishtare.

Pikërisht për këtë arsye, deklarata e Mitropolitit Onufri ka peshë të veçantë për vdekjen e një personaliteti kishtar, por një përkujtim i plagës së përçarjes, e cila vazhdon të rëndojë mbi jetën shpirtërore të Ukrainës. Në qendër të kësaj plage qëndron pyetja e madhe e unitetit kishtar, e rendit kanonik dhe e përgjegjësisë së hierarkëve përpara Perëndisë dhe popullit besimtar.

Ngjarja rikthen në vëmendje faktin se çështja kishtare në Ukrainë  ka prekur thellë jetën liturgjike, ndërgjegjen e besimtarëve dhe marrëdhëniet ndërmjet Kishave Orthodhokse.

Përçarjet kishtare nuk mbyllen vetëm me vendime, tituj apo struktura të reja. Ato kërkojnë pendim, përulësi, kthim në të vërtetën dhe shërim shpirtëror. Pa këto, çdo plagë mbetet e hapur dhe vazhdon të dhembë në trupin e Kishës.

Burime
ΕΟΔ / UGO; SPZH / UOJ; Georgia Today; Crux / Associated Press