Ungjillëzimi i Hyjlindëses në Delvinë
Liturgji Hyjnore e drejtuar nga Mitropoliti i Gjirokastrës, z. Nathanail, dhe mesazhi i shpëtimit përmes bindjes së Hyjlindëses Mari
Sot, më 25 mars, në të kremten e madhe të Ungjillëzimit të Hyjlindëses, Mitropoliti i Gjirokastrës z. Nathanail drejtoi Shërbesat e Shenjta të Mëngjesores dhe Liturgjisë Hyjnore në kishën e Ungjillëzimit, në qytetin e Delvinës.
Klerikë të zonës dhe besimtarë nga qyteti morën pjesë, gjithashtu, në këtë të kremte të madhe të kishës sonë, e cila përkujton Lajmin e Mirë, që e Tërëshenjta Mari mori nga Kryeengjëlli Gabriel për lindjen e Shpëtimtarit dhe Zotit tonë Jisu Krisht.
Ungjillëzimi përbën një ngjarje thelbësore në historinë e shpëtimit. Me përgjigjen e saj plot përulësi dhe bindje – “Ja shërbëtorja e Zotit, u bëftë sipas fjalës sate” – Hyjlindësja Mari u bë bashkëpunëtore në planin Hyjnor. Në këtë mënyrë, përmes saj, Fjala e Perëndisë u mishërua dhe hyri në botë, duke hapur rrugën për shpëtimin e njerëzimit.
Mitropolia e Hirshme e Gjirokastrës
