Kisha Ortodokse nderon Shën Irinën Hrisovalantu
Jeta e shenjtores nga Kapadokia, zgjedhja e jetës monastike dhe kujtimi i saj në traditën ortodokse
Shën Irini Hrisovalantu zë një vend të veçantë në traditën ortodokse si një nga shenjtoret që nderohen për jetën asketike dhe për dhuntinë e mrekullive. Sipas biografisë së botuar nga Enromiosini, ajo lindi në Kapadoki në vitin 828 dhe u rrit në një familje fisnike bizantine.
Babai i saj, Filareti, ishte patrik dhe komandant ushtarak i Temës së Kapadokisë, ndërsa nëna e saj quhej Zoi. Pas vdekjes së parakohshme të nënës, Irina dhe motra e saj Kallinika u rritën nën kujdesin e tezes Sofias.
Në vitet e rinisë së saj, Irina jetoi në periudhën e trazuar të ikonoklazmës. Pas vdekjes së perandorit Teofil dhe me veprimin e perandoreshës Theodhora, u rivendos nderimi i ikonave në vitin 843. Në këtë kohë, sipas rrëfimit kishtar, Irina u thirr në Kostandinopojë, pasi mendohej si bashkëshorte e mundshme për perandorin Mihail III.
Megjithatë, ajo kishte vendosur të ndiqte jetën monastike. Edhe kur familja kërkoi ta martonte me një fisnik tjetër, Irina e refuzoi këtë rrugë dhe shpalli dëshirën për t’u bërë murgeshë. Pas një sëmundjeje dhe shërimi të saj, familja pranoi vendimin.
Irina hyri në Manastirin e Shenjtorëve Kryeengjëj Mihail dhe Gavriil Hrisovalantu, pranë Kostandinopojës, ku mori veshjen murgërore. Pas gjashtë vitesh, ajo u bë igumene e manastirit. Tradita e përshkruan si një udhëheqëse shpirtërore të përkushtuar, me dhuntinë e dallimit shpirtëror dhe me famë për shërime përmes lutjeve.
Në jetëshkrimin e saj përmenden edhe ngjarje të mrekullueshme, ndër to rrëfimi se gjatë lutjes së natës ajo u pa e ngritur në ajër, ndërsa dy selvi të oborrit përuleshin para saj. Këto rrëfime janë pjesë e traditës së jetës së shënjtores që lidhet me shenjtërinë e saj.
Para fundit të jetës, Shën Irini rregulloi çështjet e manastirit, caktoi igumenen e re, mori Kungimin e Shenjtë dhe u lut para se të ndërronte jetë. Sipas sinaksarit, ajo vdiq në moshën 104-vjeçare. Kujtimi i saj kremtohet më 28 korrik.
Shën Irini Hrisovalantu nderohet veçanërisht nga besimtarët që kërkojnë ndihmë në sëmundje dhe nga gratë që luten për të pasur fëmijë.
