Kryqi i Nderuar nxirret nga thesari dhe përcillet në Kostandinopojë

Sot, Kryqi i Nderuar dhe i Jetëdhënës përkujtohet nga Kisha Ortodokse së bashku me Shtatë Martirët Makabenj, nënën e tyre Solomoni dhe mësuesin Eleazar. Festa lidhet me nxjerrjen e Kryqit të Nderuar nga thesari mbretëror.

Transferimi i Kryqit bëhej një ditë më parë, kur ai vendosej me nderime në Tryezën e Shenjtë të Kishës së Madhe, Shën Sofisë. Më pas, Druri i Nderuar përshkonte rrugët, lagjet dhe sheshet e Kostandinopojës, duke kaluar në kisha të ndryshme për shenjtërimin e vendit, bekimin e besimtarëve dhe çlirimin nga sëmundjet. Procesionet vazhdonin deri më 14 gusht dhe përfshinin qytetin me rrethinat e tij.

Kryqi paraqitet si simbol i bekimit, dashurisë dhe faljes, duke treguar rrugën drejt Ngjalljes së Krishtit dhe shpengimit të njerëzimit nga mëkati. Nga sot deri më 15 gusht, besimtarët thirren në kreshmim si përgatitje shpirtërore për festën e Fjetjes së Hyjlindëses.

Sipas traditës kishtare, shtatë martirët Avim, Andoni, Guri, Eleazar, Evsevon, Ahim dhe Markel jetuan në kohën e mbretit Antioku IV Epifani, në shekullin e dytë para Krishtit. Rreth vitit 168 p.K., mbreti detyroi hebrenjtë të mohonin fenë, zakonet dhe urdhëresat e Ligjit, si dhe të hanin mish derri, të konsideruar të papastër sipas Ligjit të Moisiut.

Të rinjtë, nëna Solomoni dhe mësuesi Eleazar mbetën të palëkundur në besimin e etërve. Eleazari u rrah, iu hodhën lëngje djegëse e helmuese në hundë dhe u dogj mbi zjarr, duke iu lutur Perëndisë që vdekja e tij të bëhej shpengim dhe liri për popullin. Shtatë të rinjtë u torturuan njëri pas tjetrit me rrota me gozhdë, shigjeta dhe zjarr, pa mohuar besimin.

Shën Solomoni ishte e pranishme në martirizimin e fëmijëve të saj dhe i nxiste të mos njollosnin besimin e të mos humbnin kurorën e lavdisë. Pas vrasjes së tyre, ajo u hodh vetë në flakë. Sipas traditës, trupi i saj ruhet i plotë në Kishën Patriarkale të Shën Gjergjit në Kostandinopojë. Makabenjtë kujtohen si dëshmi e vazhdimësisë së besimit, të dëshmuar nga profetët, apostujt, martirët dhe Etërit e Kishës.

Më parë, UGO kishte trajtuar edhe [kuptimin e Kryqit në jetën e Kishës]

.

Lexo gjithashtu