Raport i ACS: 220 milionë të krishterë viktima dhune në botë
Studimi dyvjeçar 2024-2026 i Fondacionit papnor zbulon përkeqësim të lirisë fetare në 55% të 18 vendeve të shqyrtuara, nga Afrika deri në Azi.
Të krishterë në mbarë botën vazhdojnë të jenë viktima të dhunës dhe diskriminimit për shkak të besimit të tyre. Sipas Vatican News, studimi “Të përndjekur dhe të harruar?” është publikuar më 27 tetor nga Fondacioni Papnor “Ndihmë për Kishën që vuan” (ACS) dhe mbulon periudhën 2024-2026.
Sipas statistikave të paraqitura në raport, në më se gjysmën e vendeve të shqyrtuara (55%), persekutimi i të krishterëve është rritur ndjeshëm krahasuar me periudhën dyvjeçare të mëparshme, ndërsa sot më se 220 milionë njerëz në botë janë drejtpërdrejt të ekspozuar ndaj formave më të rënda të persekutimit. 413 milionë besimtarë jetojnë në vende ku ndodhin shkelje të rënda të lirisë fetare. Raporti bazohet në rastet e vëzhguara në 18 vende dhe është publikuar më 27 tetor.
“Pas këtyre shifrave tragjike qëndrojnë fytyra, njerëz dhe familje”, shprehet Marta Petrosillo, drejtoreshë e Raportit, duke theksuar se shumë të krishterë të intervistuar, që kanë përjetuar dhunë, diskriminim dhe persekutim, kërkojnë mbi të gjitha të mos harrohen. Për njëzet vjet me radhë, raporti e ka denoncuar dhe analizuar këtë dramë, duke mos lejuar që persekutimit t'i shtohet edhe indiferenca.
Afrika subsahariane mbetet zona kryesore e veprimtarisë terroriste në botë: në Nigeri, sulmet kundër bashkësive të krishtera kanë sjellë masakra dhe miliona persona të zhvendosur, ndërsa në Burkina Faso dhe Mali raportohen ekzekutime, kufizime të lirisë fetare dhe shpërngulje të detyruara. Në Mozambik, në provincën Cabo Delgado, sulmet xhihadiste kanë shkaktuar më se një mijë viktima të krishtera që nga viti 2017, si edhe rrëmbime të grave dhe fëmijëve.
Edhe situata në Azi vlerësohet e rëndë nga autorët e raportit. Në Korenë e Veriut, të krishterët jetojnë me rrezikun e torturave, të punës së detyruar dhe të ekzekutimeve, ndërsa në Kinë kontrolli shtetëror mbi fenë shoqërohet me mbikëqyrje, arrestime dhe mbyllje të vendeve të kultit. Në Indi, ekstremizmi nacionalist dhe ligjet kundër kthimit në fe të tjera nxisin sulmet, ndërsa në Pakistan vajzat që u përkasin pakicave fetare mund të rrëmbehen, të kthehen forcërisht në fe të tjera e të martohen me detyrim.
Në Siri, bashkësia e krishterë, tashmë e pakësuar nga emigracioni, përballet me kërcënime të reja; sulmi i qershorit 2025 në kishën ortodokse greke Mar Elias, në Damask, shkaktoi 25 të vdekur dhe më se 60 të plagosur. Në Amerikën Latine, shqetëson gjendja në Nikaragua, ku qeveria e Daniel Ortega-s ushtron represion kundër Kishës Katolike përmes konfiskimit të pronave, mbylljes së institucioneve, dëbimit të klerikëve dhe kufizimeve për hyrjen në vend.
Fondacioni papnor denoncon vëmendjen e pamjaftueshme që mediat dhe institucionet perëndimore u kushtojnë persekutimeve të të krishterëve, pasi dhuna shpesh shpjegohet përmes konflikteve politike, etnike ose territoriale, duke lënë në hije arsyet fetare; raporti bën thirrje për të tërhequr vëmendjen ndërkombëtare, në mënyrë që bashkësitë e përndjekura të mos ndihen të braktisura.
UGO kishte raportuar mbi sulmin islamist ndaj tri fshatrave të krishtera në Nigeri pak ditë më parë, duke dëshmuar vazhdimësinë e dhunës ndaj bashkësive të krishtera në Afrikën subsahariane.
