Patriarku i Bullgarisë Daniel viziton Patriarkanën e Jerusalemit
Vizita zyrtare, që zgjat nga 25 deri më 30 shtator, përfshin liturgji të përbashkët me Patriarkun Theofil III dhe takime në Jordani.
Patriarku i Bullgarisë dhe Mitropoliti i Sofjes, Daniel, po realizon nga sot, e premte 25 shtator, deri më 30 shtator, një vizitë zyrtare në Patriarkanën e Jerusalemit. Sipas eeod.gr, vizita realizohet me ftesë të Patriarkut të Jerusalemit, Theofilit III, si dhe pas vendimit përkatës të Sinodit të Shenjtë të Kishës Ortodokse Bullgare.
Patriarkun Daniel e shoqëron një delegacion zyrtar i Kishës Bullgare, ku bëjnë pjesë Mitropoliti i Varnës dhe Preslavës së Madhe, Joan, Mitropoliti i Nevrokopit, Serafim, Peshkopi i Melenikut, Gerasim, Sekretari i Përgjithshëm i Sinodit të Shenjtë, protodiakoni dr. Dejan Korunoski, si dhe dr. Aleksandër Smoçevski, këshilltar patriarkal dhe përkthyes. Gjatë qëndrimit në Tokat e Shenjta, kryetari i Kishës Bullgare do të zhvillojë takime zyrtare dhe do të vizitojë vendpelegrinazhe të rëndësishme të krishterimit. Në qendër të programit qëndron liturgjia e përbashkët e Patriarkëve Theofil III dhe Daniel, që do të kryhet të dielën, 27 shtator, si shprehje e lidhjeve shekullore vëllazërore mes dy Kishave dhe e unitetit të Ortodoksisë. Pritet gjithashtu që të dy kryetarët të bashkojnë lutjet për paqen në Lindjen e Mesme.
[[read_also:ID]]
Pas përfundimit të programit në Patriarkanën e Jerusalemit, Patriarku i Bullgarisë do të vazhdojë vizitën në Mbretërinë Hashemite të Jordanisë, ku janë planifikuar takime zyrtare dhe vizita pelegrinazhi. Sipas programit, parashikohet edhe një takim i Patriarkut Daniel me Mbretin e Jordanisë, Abdullah II. Vizita në Tokat e Shenjta dhe në Jordani pritet të forcojë lidhjet e Kishës Bullgare me Patriarkanën e Jerusalemit, duke nxjerrë në pah rëndësinë e pranisë së krishterë dhe të bashkëjetesës paqësore në rajon.
Nuk është hera e parë që Patriarku Danail gjendet në qendër të kontakteve ndërkishtare ndërkombëtare; kohët e fundit vëmendja ra mbi takimin e tij me një delegacion të Fanarit.
