Mitropoliti Nathanail kremton Lartësimin e Kryqit në Gjirokastër
Liturgjia Hyjnore u zhvillua në Katedralen "Ngjallja e Krishtit", me pjesëmarrjen e klerit dhe besimtarëve që nderuan Kryqin e Shenjtë.
Lartësimi i Kryqit të Nderuar dhe Jetëdhënës, një prej festave më të rëndësishme të Kishës Orthodhokse, u kremtua në Katedralen "Ngjallja e Krishtit" në Gjirokastër. Sipas njoftimit të Mitropolisë së Shenjtë të Gjirokastrës, Liturgjia Hyjnore u drejtua nga Mitropoliti Nathanail, me pjesëmarrjen e klerit dhe të besimtarëve.
Besimtarët u mblodhën për t'iu falur Zotit dhe për të nderuar Kryqin e Shenjtë, të cilin Kisha e njeh si shenjë të fitores dhe të shpëtimit të njerëzimit. Sipas mësimit orthodhoks të përcjellë në Katedrale, Kryqi, i cili në sytë e botës u duk si shenjë turpi dhe mundimi, nëpërmjet Krishtit u bë burim jete, shprese dhe shpëtimi. Në të, Biri i Perëndisë pranoi me dashuri dhe përulësi vuajtjen për shpëtimin e botës dhe, duke mposhtur vdekjen, hapi për njerëzimin udhën drejt Ngjalljes.
Pas përfundimit të Liturgjisë Hyjnore, Mitropoliti Nathanail përcolli urimet dhe bekimet e tij atërore te të gjithë besimtarët e pranishëm. Ai u uroi që hiri i Kryqit të Nderuar dhe Jetëdhënës të jetë gjithmonë mbrojtje, forcë dhe bekim në jetën e tyre, duke theksuar rëndësinë shpirtërore të kësaj feste për besimtarët e Mitropolisë.
Siç kishte raportuar UGO, Mitropoliti i Gjirokastrës Nathanail kremtoi Liturgjinë Hyjnore në Sarandë pak javë më parë, në kuadër të vazhdimësisë së shërbesave hyjnore që ai udhëheq në dioqezë gjatë periudhës së festave të mëdha kishtare.
