Meshë në Manastirin e Boboshticës, Korçë, para festës së Lartësimit Kryqit
Ceremonia u kryesua nga At Mihal Sanellari, me pjesëmarrjen e besimtarëve nga fshati dhe qyteti i Korçës.
Manastiri i Fjetjes së Hyjlindëses në Boboshticë të Korçës u bë sërish vend takimi për besimtarë, të cilët morën pjesë të dielën në Meshën Hyjnore para festës së Lartësimit të Kryqit. Shërbesa u drejtua nga At Mihal Sanellari, me pjesëmarrjen e besimtarëve nga fshati Boboshticë dhe nga qyteti i Korçës.
Kjo meshë u zhvillua në një ambient shpirtëror, ku besimtarët vazhduan bashkëbisedimin edhe pas shërbesës, duke trajtuar çështje shpirtërore dhe shqetësime të përditshme. Manastiri, siç është theksuar edhe herë të tjera, mbetet një vatër e ngrohtë komunikimi për banorët e zonës. Epitropia e manastirit diskutoi gjithashtu për nevojat e ndryshme të institucionit dhe për format që do të mbështesin vazhdimësinë e punës mbresëlënëse pesëvjeçare të përgjegjësit të manastirit, At Mihal Sanellari.
Kremtimet e kësaj natyre në kisha dhe manastire të vendit vijojnë të tërheqin besimtarë nga zona të ndryshme, veçanërisht në prag të festave të mëdha fetare siç është Lartësimi i Kryqit. Bashkësia e Boboshticës konsiderohet një nga qendrat më aktive shpirtërore në Mitropolinë e Korçës.
Boboshtica, fshati ku ndodhet ky manastir, ka një histori të gjatë fetare dhe kulturore. Siç kishte raportuar UGO, Boboshtica e Korçës në regjistrimet osmane të shekullit XVI dëshmon për praninë e hershme të komunitetit të krishterë në këtë zonë.
