Kryepiskopi Joan bekon fëmijët në fillim të vitit të ri shkollor
Në fund të Liturgjisë Hyjnore, ai u lut që Zoti të ndriçojë mendjet dhe të pastrojë zemrat e nxënësve gjatë gjithë jetës së tyre.
Kryepiskopi Joan drejtoi sot lutjen e posaçme për bekimin e fëmijëve që nisin vitin e ri shkollor. Ceremonia u zhvillua në fund të Liturgjisë Hyjnore, të mërkurën, më 13 shtator 2026.
Në fjalën e tij, Kryebariu theksoi se, sipas besimit të krishterë, dituria e vërtetë arrihet vetëm me hirin e Perëndisë. Ai citoi mësimin e Etërve të Kishës: "Shkollo njerëz pa Zotin, që do të thotë shkollo njerëz pa vlera, dhe do të krijoni demonë". Sipas tij, njeriu i shkolluar por pa vlerat që vijnë nga mësimi i Zotit rrezikon të mbetet larg qëllimit të vërtetë të diturisë. Kryepiskopi kërkoi që Perëndia të ndriçojë mendjet dhe të pastrojë zemrat e të gjithë fëmijëve që po nisin shkollën, si dhe që bekimi hyjnor t'i shoqërojë gjatë gjithë jetës së tyre.
Pas kësaj fjale, u lexua lutja e posaçme për bekimin e fëmijëve, ku iu drejtua Perëndisë si "burim i urtësisë dhe i dijes", duke kërkuar dritë e mençuri për mësuesit dhe nxënësit e pranishëm. Në tekstin e lutjes përmenden edhe ndërmjetimet e së Tërëshenjtës Mari, të Shën Joan Pagëzorit dhe të mësuesve të mëdhenj ekumenikë, Vasilit të Madh, Grigor Theologut dhe Joan Gojartit.
Lutja për fëmijët që nisin shkollën konsiderohet një traditë e rëndësishme në kalendarin liturgjik, si moment shpirtëror që shoqëron fillimin zyrtar të mësimeve për nxënësit dhe mësuesit.
