Lindja e Hyjlindëses u kremtua në Mitropolinë e Arushës, Tanzani
Liturgjia u kremtua në fshatin Ipoasi, Tanzani, e ndoqi një drekë bamirësie e ofruar nga një dhurues anonim.
Në zemër të Tanzanisë, në Mitropolinë e Shenjtë të Arushës, festa e Lindjes së Hyjlindëses u kremtua me thjeshtësinë dhe besimin e thellë që karakterizojnë Kishën Ortodokse në Afrikë. Sipas Ieraapostoliki Stegi/ Streha Misionare, organizatë misionare që publikoi njoftimin mbi ngjarjen, ceremonia u zhvillua në një kontekst të thjeshtë por të mbushur me përkushtim shpirtëror.
Në fshatin Ipoasi, në Kishën e Shenjtë të Ungjillëzimit të Hyjlindëses, u celebrua Liturgjia Hyjnore me bekimin e Mitropolitit të Arushës, Zoti Agathonik, nga priftërinj të Mitropolisë që shërbejnë në Zonën Arkiepiskopale të Iringas. Himnet e Kishës u kënduan nga vullnetarë e vullnetare që shërbejnë si psaltë të zonës, ndërsa vullnetarë të tjerë përgatitën drekën e dashurisë që pasoi Liturgjinë, në kuadër të mensave sociale të Mitropolisë në rajon.
Dreka u ofrua nga një dhurues anonim, për prehjen e Dhimitrit dhe të afërmve të tjerë. Në Afrikë, siç theksohet në njoftim, një pjatë me ushqim nuk është thjesht një vakt, por një akt dashurie, ngushëllim dhe një dëshmi konkrete se askush nuk është vetëm. "Misioni nuk është vetëm transmetimi i fjalës së Zotit. Është prania e përditshme e Kishës pranë njeriut: Liturgjia Hyjnore, lutja, një pjatë ushqim, një buzëqeshje, një akt dashurie", thuhet në njoftimin e Strehës Misionare, e cila falënderoi dhuruesin anonim dhe uroi shëndet e bekim nga Zoti.
Nuk është hera e parë që Kisha Ortodokse në Afrikë është në vëmendje për ngjarje të rëndësishme kishtare; kohët e fundit vëmendja ra edhe mbi vendimin e Patriarkanës së Aleksandrisë për pezullimin e një mitropoliti afrikan, çka tregon dinamikën e brendshme të strukturave kishtare në kontinent.
Ieraapostoliki Stegi/Streha Misionare ftoi besimtarët të vazhdojnë të mbështesin veprën misionare, me qëllim që Ortodoksia të lulëzojë në Afrikë e gjithnjë e më shumë njerëz të njohin Krishtin dhe të drejtohen drejt shpëtimit.
