Patriarku Kiril vizitoi në spital mitropolitin që i mbijetoi sulmit me dron
Mitropoliti i Gorlovkës dhe Sllaviansk, Mitrofani, i tregoi Patriarkut të Moskës detajet e sulmit të synuar me dron pas Liturgjisë Hyjnore.
Patriarku i Moskës dhe i gjithë Rusisë, Kirili, vizitoi në spital Mitropolitin e Gorlovkës dhe Sllaviansk, Mitrofanin, i cili i mbijetoi një sulm me dron. Sipas Romfea.gr, sulmi ndodhi ndërsa besimtarët po largoheshin nga kisha pas Liturgjisë Hyjnore.
Vizita e Patriarkut u zhvillua menjëherë pas Liturgjisë Hyjnore që Kirili kremtoi në Manastirin e Shenjtë të Donskoit. Në mbërritjen e tij në spitalin "Shën Aleksi", Kryehierarku i Kishës Ortodokse Ruse u prit nga drejtori dhe kryemjeku i institucionit, A. Zarov, si dhe nga kryetari i Departamentit Sinodal të Marrëdhënieve të Kishës me Shoqërinë dhe Mediat, Vladimir Legojda. Kirili shprehu gëzimin e tij që Mitropoliti Mitrofani mbeti gjallë pas sulmit që pësoi.
Gjatë bisedës, Mitropoliti Mitrofani theksoi se ishte fjala për një sulm të synuar posaçërisht kundër tij dhe i përshkroi Patriarkut me detaje rrethanat e ngjarjes. "Duke dalë nga kisha pas përfundimit të Liturgjisë Hyjnore, pashë një dron duke fluturuar sipër besimtarëve. Fillova të bërtas fort që të largoheshin, duke e ditur se kishin vetëm sekonda në dispozicion. Unë hyra i fundit në makinë dhe droni filloi të drejtohej nga ne. Shoferi u përpoq me manovra ta shmangte sulmin, dhe unë, duke kuptuar se nuk kisha kohë, u hodha sa më larg që munda nga pika e përplasjes, e cila shpërtheu pranë nesh", tha Mitrofani.
Nga ana tjetër, Patriarku Kiril, dukshëm i tronditur, theksoi: "Zoti i gjithëmirë ju shpëtoi nga vdekja e sigurt. Sepse mund të mos kishin lënë njeri gjallë, dhe ky është fakt". Kirili shprehu bindjen se me ndihmën e stafit mjekësor me përvojë, plagët e Mitrofanit do të shërohen plotësisht dhe se ai do të mund të kthehet së shpejti në detyrat e tij të rëndësishme baritore. Para largimit, Patriarku pati një bisedë të shkurtër në oborrin e spitalit me stafin mjekësor dhe infermieror, duke shprehur urimet e tij për kujdesin që ata u ofrojnë pacientëve.
Nuk është hera e parë që Eparkia e Gorlovkës gjendet në qendër të sulmeve gjatë konfliktit në Ukrainë; kohët e fundit vëmendja ra mbi ambientet administrative të kësaj eparkie.
