Patriku Vartholome do të kremtojë 1400-vjetorin e Himnit Akathist në Konstandinopojë
Pritet që më 7 gusht ai të kryesojë Liturgjinë Hyjnore në Burimin e Shenjtë të Panagjisë Vllaherna, aty ku lidhet tradita e këngës së parë të himnit.
Himni Akathist do të përkujtohet në Stamboll me një kremtim të posaçëm në Burimin e Shenjtë i së Tërëshenjtës në Vllaherna. Sipas Orthodoxtimes, Patriku Ekumenik Vartholome do të kryesojë Liturgjinë Hyjnore më 7 gusht në këtë vend të nderuar të traditës ortodokse.
Sipas njoftimit, Patriarku do të shoqërohet nga anëtarë të suitës së tij zyrtare. Kremtimi lidhet me 1400-vjetorin e këndimit të parë të Himnit Akathist, pas çlirimit të mrekullueshëm të Kostandinopojës nga rrethimi në vitin 626. Tradita ortodokse ruan kujtimin se besimtarët u mblodhën atëherë në kishën e së Tërëshenjtës në Vllaherna për një shërbesë falënderimi gjatë gjithë natës drejtuar Hyjlindëses së Tërëshenjtë.
Në atë vigjilje, besimtarët qëndruan në këmbë duke kënduar Himnin Akathist në shenjë mirënjohjeje për ndërmjetësimin e saj. Kjo, u bë themel i një tradite që vijon edhe sot në mbarë Kishën Ortodokse.
Burimi vëren gjithashtu se deri në shekullin e shtatë, kisha e Vllahernës ishte bërë faltorja më e rëndësishme e Kostandinopojës kushtuar Virgjëreshës Mari. Ajo ruante relike të nderuara që lidhen me Hyjlindësen dhe ishte një qendër e madhe pelegrinazhi. Edhe pse bazilika historike u shkatërrua shekuj më vonë, Burimi i Shenjtë mbeti vend pelegrinazhi dhe sot mbi hagiazmën e lashtë ngrihet një kishë moderne.
Përvjetori i këtij viti paraqitet si një moment i veçantë, pasi përkujton 14 shekuj nga këndimi i parë publik i himnit pikërisht në vendin ku nisi kjo traditë. Himni Akathist vazhdon të mbetet një nga shërbesat më të dashura devocionale të Kishës dhe kremtohet çdo vit, sidomos gjatë Kreshmës së Madhe.
UGO ka raportuar më parë edhe për kremtime të lidhura me këtë traditë liturgjike.
