Mitropolia e Korçës feston Shën Pandelimonin në Tushemisht dhe Vithkuq
Mitropoliti Anastasi kreu meshën hyjnore në kishën e shenjtorit, me pjesëmarrjen e klerikëve, besimtarëve dhe të rinjve nga kampi i mitropolisë.
Festa e Shën Pandelimonit u kremtua me nderim të veçantë në Mitropolinë e Shenjtë të Korçës. Mesha hyjnore u krye në disa kisha të kushtuara shenjtorit në zonën e Korçës.
Mitropoliti i Korçës, imzot Anastasi, kremtoi festën në Kishën e Shën Pandelimonit në Tushemisht, ku morën pjesë klerikë të zonës, besimtarë vendas e vizitorë, si dhe pjesëmarrës të kampit të të rinjve. Në qytetin e Korçës, Mesha Hyjnore u mbajt në natyrë, pasi kisha e Shën Pandelimonit është e vogël, nën kryesinë e Atë Vangjel Terezit dhe me pjesëmarrjen e besimtarëve nga qyteti.
Në Vithkuq, festa u kremtua gjithashtu në kishën e kushtuar shenjtorit, nën kryesinë e Atë Dhimitër Priftit, me pjesëmarrjen e besimtarëve nga fshati dhe zona përreth. Kremtimet reflektuan traditën e nderimit që i takon Shën Pandelimonit në të gjithë Mitropolinë e Korçës, ku besimtarët nga qytetet dhe fshatrat përreth u bashkuan në lutje.
Nuk është hera e parë që Mitropolia e Korçës organizon veprimtari kishtare në Tushemisht; kohët e fundit vëmendja ra edhe mbi kampin familjar të rinisë në këtë zonë të mitropolisë.
