Në Seman nisi projekti për fëmijët dhe të rinjtë

Në të dielën e Pentikostisë, në Mitropolinë e Shenjtë të Apollonisë dhe Fierit nisi projekti me temë “Të rinjtë dhe fëmijët për një shoqëri dashurie, kujdesi dhe shërbimi”.

Nisma synon fuqizimin dhe formimin e të rinjve dhe fëmijëve si pjesë aktive e komunitetit, duke i orientuar drejt vlerave të dashurisë, kujdesit dhe shërbimit, në përputhje me mësimet e Kishës Orthodhokse.

Projekti përfshin veprimtari katekizmi, aktivitete ndërgjegjësuese dhe nisma konkrete në terren. Ndër objektivat kryesore janë mbrojtja e mjedisit, ndërtimi i një shoqërie pa bullizëm dhe përkushtimi ndaj veprave të bamirësisë, si pjesë e përgjigjes së krishterë ndaj nevojave të jetës së përditshme.

Nëpërmjet këtyre veprimtarive, projekti synon të ndërtojë një kulturë përgjegjësie, solidariteti dhe respekti reciprok. Thelbi i tij është formimi i një brezi të ri, që jo vetëm mëson për vlerat e krishtera, por i zbaton ato në jetë përmes veprimit, bashkëpunimit dhe shërbimit ndaj së mirës së përbashkët.

Në takimin me të rinjtë u zhvillua edhe tema “Mbrojtja e mjedisit, përmbushja e Porosisë së Zotit”. Mitropoliti i Apollonisë dhe Fierit, Hirësia e Tij Imzot Nikolla, së bashku me katekistët dhe grupin e të rinjve, kaluan kohë cilësore dhe sociale pranë bregdetit të Semanit.

Një nga veprimtaritë e para të projektit ishte pastrimi i një sipërfaqeje në pyllin e Semanit, si shenjë konkrete e kujdesit për krijimin dhe përgjegjësisë ndaj mjedisit.

Mitropoliti Nikolla falënderoi të rinjtë për kontributin e tyre në jetën kishtare. Ai theksoi se, kur të rinjtë rriten dhe përparojnë shpirtërisht, rritet edhe Kisha dhe forcohet i gjithë komuniteti.

Kjo nismë dëshmon rëndësinë që ka formimi i brezit të ri në jetën e Kishës. Të rinjtë dhe fëmijët nuk janë vetëm e ardhmja e komunitetit, por edhe pjesë e gjallë e tij sot, kur mësojnë të jetojnë me dashuri, përgjegjësi dhe shërbim.

Burimi: Mitropolia e Shenjtë e Apollonisë dhe Fierit

Foto
Mitropolia e Shenjtë e Apollonisë dhe Fierit