Beogradi priti me madhështi Brezin e Shenjtë të Hyjlindëses
Në festën e Analipsit, mijëra besimtarë morën pjesë në Litani me reliken e çmuar nga Manastiri i Vatopedhit, ndërsa Patriarku Porfir e cilësoi besimin si jetë që duhet të përjetohet nga çdo zemër.
Beogradi përjetoi një ditë të veçantë lutjeje dhe përshpirtërie me rastin e festës së Ngjitjes së Zotit në Qiej, e njohur në traditën serbe si Spasovdan, që është edhe festa mbrojtëse e kryeqytetit serb.
Në qendër të kremtimit të këtij viti ishte prania e Brezit të Shenjtë të Hyjlindëses, një nga reliket më të çmuara të Orthodhoksisë, i cili u soll nga Manastiri i Vatopedhit në Malin e Shenjtë. Relikja mbërriti në Beograd më 20 maj 2026 dhe u prit në aeroport nga Patriarku i Serbisë, Fortlumturia e Tij Porfirije, si edhe nga Presidenti i Serbisë, Aleksandar Vučić.
Të enjten, më 21 maj 2026, në ditën e Spasovdanit, mijëra besimtarë morën pjesë në litaninë madhështore që përshkoi rrugët kryesore të Beogradit. Procesioni u drejtua nga Patriarku Porfirije, ndërsa në të morën pjesë edhe Igumeni i Manastirit të Vatopedhit, Arkimandrit Efremi, si edhe Igumeni i Manastirit të Hilandarit, Arkimandrit Metodi.
Litania u nis nga Kisha e Ngjitjes së Zotit dhe vijoi drejt Kishës së Shën Savës në Vraçar, ku Brezi i Shenjtë u vendos për t’u nderuar nga besimtarët. Gjatë rrugës u bënë ndalesa lutjeje në pika të rëndësishme të qytetit. Në sheshin “Slavija”, kleri lexoi Ungjillin dhe u lut për bekimin e Beogradit dhe të popullit.
Në fjalën e tij, Patriarku Porfir theksoi se besimi nuk mund të kufizohet vetëm brenda mureve të kishës. Ai tha se besimi duhet të hyjë në çdo rrugë, në çdo shtëpi dhe në çdo zemër, sepse ai duhet të përshkojë të gjithë jetën e njeriut. Patriarku u bëri thirrje besimtarëve të “rrethohen me besim” dhe ta vendosin gjithmonë Krishtin mbi gjithçka, që në zemrat e tyre të mos ketë vend për frikë dhe urrejtje.
Prania e Brezit të Shenjtë të Hyjlindëses i dha kremtimit të këtij viti një peshë të veçantë shpirtërore. Për popullin serb, kjo relike u prit si shenjë bekimi, ngushëllimi dhe mbrojtjeje të Nënës së Zotit, në një ditë kur qyteti mblodhi mijëra njerëz në lutje të përbashkët.
Brezi i Shenjtë do të qëndrojë në Kishën e Shën Savës deri më 29 maj, në mënyrë që besimtarët nga Serbia dhe nga vendet përreth të kenë mundësi ta nderojnë. Për këtë arsye, kisha do të qëndrojë e hapur ditë e natë, ndërsa klerikët do të jenë vazhdimisht në shërbim pranë relikes. Pas nderimit, besimtarët do të marrin edhe një fjongo të bekuar në Brezin e Shenjtë.
EΟD / UGO, SPZH / UOJ, Zougla, SRNA
Foto, Video EOD
