Patriarku Porfir hapi ekspozitën “Shën Sava” në Beograd

Patriarku i Serbisë, Porfir, hapi në Beograd ekspozitën historike “Shën Sava”, kushtuar 850-vjetorit të lindjes së Rastko Nemanjiçit, Shën Savës, Kryepiskopit të parë të Kishës së pavarur Serbe dhe një prej figurave më të rëndësishme të historisë shpirtërore e kulturore serbe.

Ekspozita u hap më 14 maj 2026 në Galerinë e Akademisë Serbe të Shkencave dhe Arteve. Ajo është organizuar nga Galeria e Akademisë dhe Muzeu i Kishës Orthodhokse Serbe, me qëllim paraqitjen e jetës, veprës dhe trashëgimisë së Shën Savës për publikun bashkëkohor.

Në ceremoninë e hapjes morën pjesë hierarkë të Kishës Orthodhokse Serbe, përfaqësues të institucioneve shtetërore dhe kulturore, anëtarë të Akademisë Serbe, përfaqësues të trupit diplomatik, si edhe ministra të kulturës nga Serbia dhe Greqia.

Në fjalën e tij, Patriarku Porfir theksoi se ekspozita nuk hap vetëm një faqe të historisë, por edhe kujtesën tetëshekullore shpirtërore, kulturore dhe historike të popullit serb, të mbledhur rreth figurës së Shën Savës. Sipas tij, trashëgimia e Shën Savës nuk u ndërtua mbi forcën, por mbi të vërtetën, drejtësinë, ndriçimin shpirtëror dhe përgjegjësinë.

Ekspozita paraqet dorëshkrime, ikona, dokumente historike, libra të vjetër, vepra kishtare dhe artistike, si edhe materiale digjitale e multimediale. Nëpërmjet tyre, vizitorët njihen me rolin e Shën Savës në organizimin e jetës kishtare, në formimin e identitetit shpirtëror serb dhe në zhvillimin e kulturës mesjetare.

Sipas njoftimit të RTS-së, ekspozita është ndërtuar në pesë njësi tematike dhe paraqet jetën, veprën dhe trashëgiminë e Shën Savës. Ndër objektet më të rëndësishme përmenden kopja e shkopit igumenik të Hilandarit, një kopje e Tipikut të Karejës nga shekulli XIII dhe kopja e ikonës së Hyjlindëses “Triherusa”.

Ekspozita “Shën Sava” do të qëndrojë e hapur për vizitorët deri më 19 korrik 2026 raport UGO të Serbisë

 

 

Fotot nga  spc.rs