Patriarku i Bullgarisë Daniil: “Patriarku Ilia II ishte vërtet njeri i Zotit”
Patriarku i Bullgarisë, Fortlumturia e Tij Daniil, shpreh ngushëllimet e tij për ndarjen nga
jeta të Patriarkut të Gjeorgjisë, Ilia II, drejtuar Mbajtësit të Fronit dhe Kishës së Gjeorgjisë
Fortlumturia e Tij i referohet personalitetit të të ndjerit, duke e cilësuar si shtyllë të unitetit të popullit Gjeorgjian në disa nga momentet më të vështira dhe më të trazuara të historisë së tij.
“Ishte mbështetje, udhërrëfyes dhe bashkues i popullit Gjeorgjian, por edhe një shembull i ndritur dhe frymëzues për të gjithë ne. Ishte një llambë që ‘ndriçon për të gjithë’ (Mat. 5:15), sepse ‘nga thesari i mirë i zemrës së tij’ (Luka 6:45) nxirrte vetëm të mirën. Patriarku Ilia II ishte vërtet njeri i Zotit!”, theksoi ai.
“Nuk do ta harrojmë kurrë, por do ta kujtojmë gjithmonë me emocion dhe mirënjohje mbështetjen vëllazërore të Patriarkut Ilia II ndaj Kishës Ortodokse Bullgare kanonike, nën drejtimin e Patriarkut të ndjerë bullgar Maksim, gjatë periudhës së përçarjes tragjike në Bullgari. Ai kurrë nuk e tradhtoi të vërtetën, të cilën gjithmonë e predikonte me dashuri të sinqertë dhe sakrifikuese”, thuhet në mesazh.
“Lutemi që Zoti ynë Jezu Krisht, me ndërmjetësimin e lutjeve të Nënës së Tij të Gjithënderuar, Hyjlindëses dhe Gjithmonë Virgjërës Mari, ta prehë shpirtin e shërbëtorit të Tij të bekuar dhe të paharruar, Patriarkut të gjithë Gjeorgjisë Ilia II, duke i falur çdo mëkat të bërë me fjalë, vepra apo mendime, dhe ta vendosë në banesat e të drejtëve.
Urojmë që Zoti t’i dhurojë paqe dhe ngushëllim popullit Gjeorgjian dhe të caktojë një pasues të denjë të Patriarkut të ndjerë Ilia II! Zoti e faltë! Qoftë i përjetshëm dhe i bekuar kujtimi i tij!”, përfundon mesazhi.
