Në moshën 92-vjeçare u nda nga jeta Patriarku i gjithë Gjeorgjisë Ilia II
Një përkushtim për jetën dhe veprën e udhëheqësit historik që reformoi Kishën Gjeorgjiane
Në moshën 92-vjeçare, në vitin e 49-të të fronëzimit të tij në fronin patriarkal, u nda nga jeta Patriarku i gjithë Gjeorgjisë, Kryepeshkopi i Mtskheta-Tbilisit dhe Mitropoliti i Bichvinta dhe Tskhum-Abkhazisë, Ilia II, sipas raportimeve të mediave Tabula dhe Mtavari.
“Froni patriarkal është bosh. Duke filluar nga sot, deri në zgjedhjen e një primati të ri, Kisha Apostolike Autoqefale Ortodokse e Gjeorgjisë do të drejtohet nga vendmbajtësi i fronit patriarkal”, deklaroi Mitropoliti Shio Mujiri.
Ilia II ishte I Parë Hierarku i 141-të i Kishës Gjeorgjiane. Patriarku i Gjeorgjisë u dërgua në Qendrën Mjekësore të Kaukazit në mbrëmjen e vonë të 17 marsit për shkak të një hemorragjie të rëndë gastrike. Patriarku i moshuar u trajtua në repartin e kujdesit intensiv dhe u mbajt nën mbështetje respiratore.
Jeta dhe shërbesa
Patriarku Ilia II (me emrin civil Irakli Ghudushauri-Shiolashvili) lindi më 4 janar 1933 në Vladikavkaz (Osetia e Veriut-Alania).
Ai u diplomua në Akademinë Teologjike të Moskës në vitin 1960. Në vitin 1957 u bë murg dhe mori emrin Ilia.
Më 18 prill 1957 u hirotonis jerodiakon në Patriarkanën e Sionit, ndërsa më 10 maj 1959 u hirotonis prift në Lavrën e Manastirit të Shën Sergjit.
Pas kthimit në Gjeorgji, u emërua prift në Katedralen e Batumit.
Më 19 dhjetor 1961 u ngrit në gradën e igumenit, ndërsa më 16 shtator 1961 në gradën e arhimandritit.
Më 26 gusht 1963 u emërua horepiskop i Patriarkut.
Nga viti 1963 deri në 1972 shërbeu si rektori i parë i Seminarit Teologjik të Mtskhetës, ndërsa në vitin 1967 u transferua në Prefekturen e Abkhazisë.
Në vitin 1969 u ngrit në gradën e mitropolitit, ndërsa më 9 nëntor 1977 u emërua patriark.
Më 23 dhjetor 1977 u zgjodh Patriark i gjithë Gjeorgjisë.
Kontributi në Kishën dhe shoqërinë Gjeorgjiane
Me bekimin e Ilia II u botuan Bibla, përmbledhje teologjike, revista, libra dhe kalendarë kishtarë në gjuhën moderne Gjeorgjiane, si dhe u themeluan gazeta kishtare.
Në vitin 1988, nën drejtimin e tij, Seminari Teologjik i Mtskhetës u transferua në Tbilisi dhe u themelua Akademia-Seminar Teologjik i Tbilisit. Gjithashtu u hapën seminare teologjike në Batumi, Akhaltsikhe dhe Kutaisi.
Pas shumë shekujsh, u restauruan edhe Akademia Teologjike e Gelatit dhe Akademia e Shkencave e Gelatit nën kujdesin e Kishës.
Brenda 20 vjetësh, numri i eparkive të Kishës Gjeorgjiane u rrit nga 15 në 33, numri i manastireve në 53, ndërsa kleri arriti në rreth 1.000.
Gjatë kësaj periudhe u kanonizuan shenjtorë të rinj dhe u ndërtua Katedralja e Trinisë së Shenjtë në Tbilisi.
Veprimtaria ndërkombëtare
Në vitin 1960, për të marrë doktoraturën në teologji nga Akademia Teologjike e Moskës, ai mbrojti disertacionin me temë:
“Historia e Manastirit Iviron në Malin Athos”.
Nga 1978 deri në 1983 shërbeu si President i Këshillit Botëror të Kishave. Që nga viti 1997 ishte anëtar i Akademisë Ndërkombëtare të Informatikës pranë OKB-së dhe anëtar nderi i Akademisë Teologjike të Kretës.
Ai mori gjithashtu doktorata nderi në teologji nga Akademia Teologjike e Nju-Jorkut dhe nga Seminari Teologjik i Shën Tikonit në SHBA.
Zëri i Kishës në momente historike
Në prill 1989, gjatë protestave në Tbilisi, forcat sovjetike sulmuan demonstruesit paqësorë në 9 prill 1989, duke vrarë 21 persona.
Ilia II iu drejtua protestuesve dhe në të njëjtën ditë kremtoi shërbesën e parë përkujtimore në Patriarkanën e Sionit për viktimat, duke i quajtur ata martirë të lirisë së atdheut.
Vizita historike e Papës
Nga 30 shtatori deri më 2 tetor 2016, Papa Françesku vizitoi Gjeorgjinë me ftesë të Presidentit të vendit dhe të Patriarkut Ilia II.
Papa vizitoi Mtskhetën dhe Katedralen Svetitskhoveli, ku sipas traditës ruhen relike të rëndësishme të krishterimit. Ilia II e cilësoi këtë vizitë historike për marrëdhëniet ndërmjet Kishave.
