Ikonat bizantine në fokus të një konference në Muzeun e Luvrit

Ikonat bizantine ishin në qendër të vëmendjes në Muzeun e Luvrit, një prej tempujve më të mëdhenj të kulturës botërore, ku iu kushtua një mbrëmje e veçantë trashëgimisë kulturore orthodhokse të zhvilluar në Shqipërinë e sotme. Sipas ATSH, mbrëmja u organizua në kuadër të një konference për bashkëpunimin kulturor dhe shkencor mes Shqipërisë dhe Francës.

Pikënisja e diskutimit ishte ekspozita "Ikonat e Shqipërisë, thesare të Muzeut Kombëtar të Artit Mesjetar të Korçës", aktualisht e paraqitur në Muzeun e Arteve të Bukura të Chambéry-së. Nën titullin "Kur diplomacia ndërkombëtare frymëzon kërkimin shkencor", Nicolas Bousquet, drejtor i muzeve të Chambéry-së, tregoi historinë e kësaj ekspozite, të lindur nga binjakëzimi mes Korçës dhe Chambéry-së dhe nga bashkëpunimi i ngushtë me Muzeun Kombëtar të Artit Mesjetar të Korçës. Maximilien Durand, drejtor i Departamentit të Arteve të Bizantit dhe të Krishterimeve të Lindjes në Muzeun e Luvrit, ofroi një rrugëtim në historinë e pikturës bizantine dhe pasbizantine në Shqipëri, duke ndriçuar pasurinë artistike të veprave dhe perspektivat shkencore të hapura nga bashkëpunimi me specialistët shqiptarë.

I pranishëm në takim, ambasadori i Shqipërisë në Francë, Dritan Tola, shprehu nderin dhe emocionin që trashëgimia shqiptare, që në fakt është ajo e krishterë orthodhokse, vlerësohet dhe promovohet në Muzeun e Luvrit, duke përshëndetur të dy konferencierët. "Kur diplomacia krijon ura ndërmjet institucioneve dhe popujve, ajo bëhet gjithashtu burim frymëzimi për kërkimin shkencor, dijen dhe rizbulimin e trashëgimisë sonë të përbashkët evropiane", u shpreh ambasadori Tola. Muzeu Kombëtar i Artit Mesjetar shprehu falënderime për Maximilien Durand dhe Nicolas Bousquet, si dhe për Françoise Mardrus, Drejtore e Studimeve Muzeale në Muzeun e Luvrit, për mikpritjen e kësaj etape të një aventure kulturore që lidh Shqipërinë, Francën dhe Evropën.

Siç kishte raportuar UGO, mbi 45 ikona të Muzeut Mesjetar të Korçës u ekspozuan për herë të parë në Francë, në kuadër të së njëjtës nismë kulturore që lidh Shqipërinë dhe Francën përmes trashëgimisë bizantine dhe pasbizantine.

Lexo gjithashtu