Vandalizohet Kisha e Shën Thanasit në Sinicë të Korçës

Kisha e Shën Thanasit pas vandalizimit

Vandalizmi ka goditur kishën e Shën Thanasit, në fshatin Sinicë të Korçës, një objekt kulti i vendosur në një zonë malore, në lartësinë rreth 1.300 metra mbi nivelin e detit. Sipas reportazhit të UGO, persona ende të paidentifikuar kanë hyrë në ambientet e kishës, duke thyer ikona, dëmtuar objekte të shenjta dhe hedhur çimento brenda saj.

Sipas dëshmive të banorëve, autorët kanë shkatërruar fillimisht thasët me çimento të siguruar për mirëmbajtjen e kishës, duke i grisur dhe derdhur përmbajtjen në tokë, para se të hynin brenda dhe të përmbysnin gjithçka kanë mundur. Për ngjarjen janë njoftuar si Policia, ashtu edhe Mitropolia e Shenjtë Korçë. Ngjarja është denoncuar nga banorët dhe dashamirësit e fshatit, të cilët prej vitesh kujdesen vullnetarisht për mirëmbajtjen e këtij simboli të traditës dhe kulturës lokale. Terreni është i vështirë, pa rrugë të përshtatshme dhe pa furnizim me ujë, prandaj banorët besojnë se autorët kanë shkuar deri atje me një qëllim të përcaktuar.

Banorët dyshojnë se akti mund të jetë një provokim i ardhur pas një publikimi të faqes "Korça Report", i titulluar "Sinica e gjunjëzuar në valle greke", ku fshatarët etiketoheshin dhe përqeshëshin për faktin se gjatë festës kishin kërcyer edhe valle greke. Sipas tyre, gjuha përçarëse e këtij publikimi mund të ketë nxitur elementë nacionalistë ekstremistë drejt aktit konkret të vandalizmit, megjithëse kjo mbetet vetëm një pistë e ngritur nga vetë banorët dhe jo një përfundim zyrtar i hetimit. U takon organeve kompetente të përcaktojnë nëse ekziston një lidhje ndërmjet publikimit dhe vandalizmit.

Banorët e Sinicës shprehen se dëmtimi i kishës nuk cenon vetëm një objekt historik e fetar, por edhe harmoninë dhe bashkëjetesën ndërfetare të komunitetit, pasi kisha respektohet dhe nderohet si nga banorët e krishterë, ashtu edhe nga ata myslimanë të zonës. Në historinë e fshatit kujtohen disa raste kur objekti i kultit është rindërtuar dhe mirëmbajtur falë kontributit të përbashkët të banorëve, pa dallim feje.

Duke e cilësuar vandalizmin si një goditje ndaj historisë dhe trashëgimisë së tyre, banorët i bëjnë thirrje autoriteteve të zbardhin ngjarjen, të identifikojnë dhe të vënë përpara drejtësisë përgjegjësit.

Nuk është hera e parë që kisha e Sinicës gjendet në vëmendjen e jetës fetare të zonës; kohët e fundit fshati kishte kremtuar festat e Pashkës dhe të Shën Nikollës në kuadër të Mitropolisë së Shenjtë Korçë.

Lexo gjithashtu