Kisha nderon sot Oshënare Angjelina Araniti, mbesë e Skënderbeut

Kisha Orthodhokse kujton sot, 30 korrik, Oshënare Angjelina Araniti, një nga figurat femërore më të nderuara të historisë sonë kishtare. Sipas kalendarit kishtar orthodhoks, jeta e saj lidhet ngushtë me familjen e Gjergj Kastriotit, Heroit tonë Kombëtar.

Angjelina lindi rreth vitit 1440, bijë e feudalit shqiptar Gjergj Araniti, një ndër prijësit e parë vendas që u ngritën kundër pushtimit turk në fillim të shekullit XV. Motra e saj, Andronika (Donika), u martua me Gjergj Kastriotin. Në vitin 1461, Angjelina u martua në Shkodër me Stefanin e verbër, të birin e dhespotit të Serbisë, Gjergj Brankoviçit, të cilin e njohu në vitin 1459, kur ai me të atin u strehuan pranë familjes Araniti, duke ikur nga përndjekja turke.

Pas ndërrimit jetë të bashkëshortit, në vitin 1471, Angjelina u vendos në Krushedol, në veri të Serbisë, ku ngriti një manastir dhe u bë murgeshe. Aty ia përkushtoi gjithë jetën e saj të varfërve, duke u thirrur me dashuri “nënë Angjelina”. Besimtarët i drejtoheshin me lutje për t’u çliruar nga sunduesit e tyre, ndërsa edhe jo-besimtarë janë shëruar prej saj dhe janë mrekulluar për fuqinë e besimit të krishterë.

Siç ka ndodhur edhe në raste të tjera kushtuar shenjtorëve të kalendarit orthodhoks, kujtimi i figurave si Angjelina lidhet ngushtë me historinë e krishterimit në trojet shqiptare dhe në rajon.

Angjelina ndërroi jetë në vitin 1520. Në vitin 1716, turqit dogjën manastirin e Krushedolit bashkë me lipsanet e saj, por murgeshat arritën të shpëtojnë vetëm një pjesë të lipsanit, dorën e majtë të shenjtes, e cila ruhet edhe sot në arkën e kishës së manastirit të Krushedolit.

Lexo gjithashtu