Kryepiskopi Joan priti në Tiranë pjesëmarrësit e forumit europian Religions for Peace

Kryepiskopi Joan i Kishës Orthodhokse Autoqefale të Shqipërisë priti sot në Tiranë pjesëmarrësit e forumit europian "Religions for Peace Europe", në kuadër të dialogut ndërfetar. Sipas Kishës Orthodhokse Autoqefale të Shqipërisë, takimi u zhvillua në kuadër të forumit rajonal dhe programit të trajnimit "Shared Sacred Flourishing", i cili po zhvillohet aktualisht në Tiranë.

Gjatë bashkëbisedimit u ndanë mendime mbi rolin e komuniteteve fetare në promovimin e paqes, dialogut dhe bashkëpunimit ndërfetar, si një kontribut i rëndësishëm për ndërtimin e një shoqërie më të drejtë dhe më paqësore. Fortlumturia e Tij do të jetë gjithashtu një ndër folësit kryesorë të sesionit kushtuar dialogut ndërfetar, ku do të ndajë përvojën e Kishës Orthodhokse Autoqefale të Shqipërisë dhe modelin shqiptar të bashkëjetesës e bashkëpunimit ndërfetar. Forumi mbledh në Tiranë përfaqësues të komuniteteve fetare, institucioneve publike dhe organizatave të shoqërisë civile të Këshillave Ndërfetarë të Evropës.

Synimi i nismës është forcimi i kulturës së paqes dhe i angazhimit të përbashkët të komuniteteve fetare në shërbim të së mirës së përbashkët në Evropë. Pjesëmarrja e Kryepiskopit Joan në këtë sesion vjen si vazhdimësi e kontributit të Kishës Orthodhokse Autoqefale të Shqipërisë në promovimin e bashkëjetesës dhe bashkëpunimit ndërfetar në vend, i njohur shpesh si "modeli shqiptar".

Nuk është hera e parë që Kryepiskopi Joan angazhohet në takime ndërkombëtare mbi çështje fetare e shoqërore; kohët e fundit vëmendja ra mbi vizitën e tij në SHBA.

Lexo gjithashtu