Deputetë britanikë: kishat historike përballen me presion joviabël

Kisha historike janë në rrezik në Angli, Foto nga christiantoday

Kishat historike të Anglisë po përballen me presione gjithnjë e më "joviabël", sipas një raporti të ri parlamentar britanik. Sipas christiantoday, mijëra kisha në Angli varen nga vullnetarë dhe përballen me kosto mirëmbajtjeje që tejkalojnë mundësitë e komuniteteve vendore.

Komisioni ndërpartiak i Kulturës, Mediave dhe Sportit i Dhomës së Komuneve publikoi raportin me titull "Protecting Built Heritage" pas një hetimi 18-mujor, gjatë të cilit u depozituan 113 memorandume me shkrim dhe u dëgjuan dëshmi nga përfaqësues të trashëgimisë dhe të Kishës së Anglisë. Raporti thekson se kishat, katedralet dhe ndërtesat e tjera historike rrezikohen gjithnjë e më shumë nga rritja e kostove të riparimeve, mungesa e fuqisë punëtore të specializuar dhe një sistem lejesh ndërtimi që shpesh e bën rikonstruksionin më të vështirë se ndërtimin e ri. Anglia ka mbi 370.000 ndërtesa të mbrojtura, prej të cilave rreth 14.800 janë vende fetare, ndërsa 83% e tyre i përkasin Kishës së Anglisë, e cila shpenzon mbi 1 miliard paund në vit vetëm për mirëmbajtjen e ndërtesave të saj.

Raporti shpreh shqetësim edhe për zëvendësimin e skemës aktuale të subvencioneve, "Listed Places of Worship Grant Scheme", me fondin e ri "Places of Worship Renewal Fund", duke paralajmëruar se disa kisha me rëndësi të veçantë historike mund të mbeten pa mbështetje të mjaftueshme financiare. Deputetët kërkojnë gjithashtu një lehtësim të targetuar të TVSH-së për mirëmbajtjen dhe konvertimin e ndërtesave të mbrojtura, pasi heqja e përjashtimit përkatës ka bërë disa projekte financiarisht të pamundura për t'u realizuar.

Kryetarja e komisionit, Dame Caroline Dinenage, deklaroi se politika aktuale qeveritare dështon si në mbrojtjen e ndërtesave historike, ashtu edhe në shfrytëzimin e potencialit të tyre më të gjerë. Ajo kërkoi hartimin e një programi kombëtar "heritage-to-housing", me parimin "ripërdorimi i parë", duke theksuar se shfrytëzimi i ndërtesave bosh të mbrojtura mund të sjellë deri në 670.000 banesa të reja, sipas vlerësimeve të Historic England, ndërsa turizmi i trashëgimisë kulturore kontribuon rreth 20 miliardë paund në vit në ekonominë britanike.

Siç kishte raportuar UGO, pak ditë më parë, teksa vëmendja ndaj çështjeve të Komunitetit Anglikan në Britani vazhdon të rritet edhe në planin ndërkishtar.

Çështja e mbijetesës financiare të ndërtesave fetare historike në Britani nuk është e re: një shqetësim i ngjashëm ishte ngritur më herët edhe në lidhje me shpëtimin e një kishe mesjetare në Angli me ndihmën e fondeve të llotarisë kombëtare.

Lexo gjithashtu