Kisha Ortodokse kujton Hierodëshmorin Pangrati të Tavromenisë

Kisha Ortodokse kujton sot Shenjtorin e ditës Hierodëshmorin Pangrati të Tavromenisë, një ndër figurat më të hershme të krishterimit në Siçili. Sipas kalendarit kishtar ortodoks, më 9 korrik përkujtohen gjithashtu Dëshmorët Andrea dhe Provi, si dhe Hierodëshmori i ri Metodi.

Sipas traditës, Pangrati lindi nga prindër të pasur e të mirë në Antioki dhe u pagëzua bashkë me ta në Jerusalem. Pas vdekjes së prindërve, u bë eremit në një shpellë të Pontit, ku u takua me apostujt Petro dhe Pavël, të cilët e dorëzuan episkop të Tavromenisë në Siçili. Aty ai ndriçoi shumë idhujtarë përmes predikimit dhe mrekullive, duke bërë që idhujt të rrëzoheshin, ndërsa demonët rrëfenin ardhjen e Perëndisë së vërtetë. I mundi pushtuesit e ishullit duke ngritur kundër tyre një kryq dhe dy ikona.

Fundi i tij erdhi kur heretikë smirëzinj organizuan linçimin e tij në mungesë të qeveritarit Bonifat, të cilin shenjti e kishte kthyer në besim. Trupi i tij, i vendosur fillimisht në një arkivol të florinjtë, u zhvarros sipas dëshirës së tij për thjeshtësi, ndërsa lipsani i pagjymtuar lëshoi erë miro. Atletizimin e tij e parashikoi në Romë apostulli Petro.

Në po këtë ditë kremtohet edhe Hierodëshmori i ri Metodi, ish-igumen i manastirit të Të Patrupëve në dioqezën e Amarionit në Kretë dhe më pas episkop i Lappas. Ai kundërshtoi shkeljen e të drejtave të Kishës nga autoritetet osmane dhe, pasi u denoncua nga igumeni i manastirit të Farantonit, u torturua në mënyrë çnjerëzore, duke marrë kurorën e martirit më 9 korrik 1793.

[Kujtimi i shenjtorëve të kalendarit ortodoks] mbetet pjesë e pandashme e jetës shpirtërore të besimtarëve ortodoksë, që rikthehen çdo ditë te shembujt e shenjtorëve për fuqi e frymëzim.

Lexo gjithashtu