Ceremonia e mbylljes së studimeve u zhvillua në Korçë

Foto nga cerememonia UGO.al

Maturantët u përcollën me urime, këshilla dhe mesazhe për të ardhmen, në një ceremoni të thjeshtë dhe plot kuptim

Ditën e djeshme, në Kolegjin “Platon” në qytetin e Korçës, u zhvillua ceremonia e mbylljes së studimeve për nxënësit e vitit të tretë të gjimnazit. Në një atmosferë festive dhe emocionuese, maturantët u përshëndetën nga drejtues kishtarë, përfaqësues të arsimit, prindër, mësues dhe bashkënxënës.

Në ceremoni morën pjesë Hirësia e Tij, Mitropoliti i Korçës, Imzot Anastasi, Hirësia e Tij, Mitropoliti i Dhimitriadhës dhe Almiros, Imzot Ignati, Drejtori i Fondacionit “Frymë Dashurie”, z. Andi Rrëmbeci, fondacion që administron shkollën dhe i përket Kishës Orthodhokse Autoqefale të Shqipërisë, zëvendëskoordinatorja e Arsimit Grek në Shqipëri, znj. Kreuza Andreu, prindër, nxënës dhe stafi mësimor i Kolegjit, i udhëhequr nga drejtoresha znj. Elena Tushi.

Në fjalën e tij përshëndetëse, Mitropoliti i Korçës, Imzot Anastasi, përgëzoi maturantët për përfundimin e kësaj etape të rëndësishme të jetës së tyre shkollore dhe u përcolli urimet më të mira për rrugën që hapet përpara tyre. Ndër të tjera, ai i këshilloi të mos e harrojnë vendin e tyre dhe të ruajnë dëshirën për t’u kthyer një ditë e për të kontribuar në të. Ai theksoi se të rinjtë duhet të kenë në zemër ëndrrën që Korça jonë të bëhet një vend ku ata vetë do të dëshironin të jetonin, të punonin dhe të ndërtonin familjet e tyre.

Më pas, përshëndeti të pranishmit Mitropoliti i Dhimitriadhës dhe Almiros, Imzot Ignati, i cili falënderoi Mitropolitin e Korçës, Imzot Anastasin, për ftesën dhe mikpritjen. Në fjalën e tij ai kujtoi mësuesin e përbashkët, Kryepiskopin e ndjerë Anastas, i cili, siç theksoi, i këshillonte gjithmonë të kërkonin të vërtetën. Këtë të vërtetë ai e kishte gjetur te Krishti, dhe pikërisht kjo e shndërroi në një shembull të gjallë të dashurisë së vërtetë.

Duke iu drejtuar nxënësve, Imzot Ignati u uroi që të ndjekin këtë shembull, duke kërkuar në jetë të vërtetën, dashurinë dhe shërbimin ndaj njeriut.

Në vijim, Drejtori i Fondacionit “Frymë Dashurie”, z. Andi Rrëmbeci, përgëzoi nxënësit për arritjet e tyre dhe u uroi suksese të mëtejshme në studime dhe në jetën e tyre. Ai vlerësoi përkushtimin e tyre gjatë viteve të shkollimit dhe shprehu urimin që formimi i marrë në Kolegjin “Platon” t’i ndihmojë në rrugën e tyre të ardhshme.

Edhe zëvendëskoordinatorja e Arsimit Grek në Shqipëri, znj. Kreuza Andreu, uroi maturantët për sukseset e arritura. Ajo theksoi se fjalët e parafolësve e përfaqësonin plotësisht edhe atë, ndërsa përgëzoi në mënyrë të veçantë mësuesit për kontributin e tyre të çmuar. Znj. Andreu vuri në dukje se mësuesit shpesh e tejkalojnë veten dhe sakrifikojnë përtej detyrës së tyre të përditshme, në shërbim të nxënësve dhe të shkollës.

Ceremonia u mbyll me përshëndetjen e drejtoreshës së Kolegjit “Platon”, znj. Elena Tushi, e cila falënderoi të pranishmit, prindërit, stafin pedagogjik dhe vetë nxënësit. Ajo u uroi maturantëve suksese të mëtejshme, duke shprehur besimin se ata do të dinë ta përfaqësojnë denjësisht shkollën në çdo hap të jetës së tyre.

Në fund, fotografia e përbashkët dhe çasti simbolik i hedhjes së kapelave në ajër nga maturantët i dhanë ceremonisë ngjyrën e gëzimit dhe të emocionit. Kështu u mbyll një ceremoni e thjeshtë, por plot kuptim, ashtu siç i ka hije një momenti të rëndësishëm në jetën e çdo nxënësi.

Nuk është hera e parë që Korça zë vend në lajmet kishtare; kohët e fundit vëmendja ra mbi kremtimin e së Shtunës së Shpirtrave në Korçë.

Foto dhe video UGO

Lexo gjithashtu