49 ikona shqiptare ekspozohen në Chambéry deri në nëntor 2026

Ikonat shqiptare kanë arritur në zemër të Francës: Musée des Beaux-Arts/Les Charmettes në Chambéry pret ekspozitën "Ikonat e Shqipërisë – Thesaret e Muzeut Kombëtar të Artit Mesjetar" i cili realisht është Muzeu i Artit Bizantin. Sipas faqes zyrtare të muzeut francez, ekspozita sjell para publikut 49 vepra të zgjedhura nga fondi i Muzeut Kombëtar të Artit Mesjetar në Korçë.

Veprat i përkasin periudhës nga shekulli XIV deri në fillim të shekullit XX dhe përfaqësojnë shkolla, periudha dhe tradita të ndryshme të artit ikonografik orthodhoks. Mes autorëve të përfaqësuar gjenden Onufri, Kostandin Shpataraku, Kostandin Jeromonaku, vëllezërit Kostandin, Athanasi nga Korça, si edhe përfaqësues të familjes Zengo dhe përbëjnë shprehje absolute të krijimtarisë shpirtërore orthodhokse dhe të komunitetit rum. Ekspozita përfshin gjithashtu vepra të mjeshtërve anonimë, të cilat dëshmojnë zhvillimin e artit bizantin dhe pasbizantin në trevat ku sot shtrihet shteti shiptar.

Drejtorja e Muzeut Kombëtar të Artit Mesjetar, Fjoralba Prifti, e cilësoi bashkëpunimin si një hap të rëndësishëm për promovimin ndërkombëtar të koleksionit. Sipas saj, prezantimi në Chambéry hap një kapitull të ri për njohjen e trashëgimisë ikonografike shqiptare jashtë vendit.

Ekspozita u realizua në bashkëpunim me Bashkinë e Chambéry-t, Bashkinë Korçë, Muzeun Kombëtar të Artit Mesjetar dhe Ministrinë e Turizmit, Kulturës dhe Sportit, me mbështetjen e ambasadave të Francës në Shqipëri dhe të Shqipërisë në Francë. Në kuadër të saj është hartuar edhe një katalog shkencor nga studiues të artit bizantin nga të dy vendet.

Materiali prezantues thekson se koleksioni lidhet ngushtë me historinë e ruajtjes së trashëgimisë kulturore gjatë regjimit komunist: pas vitit 1967, shumë kisha, manastire dhe objekte kulti u mbyllën ose u shkatërruan. Ikonat u shpëtuan falë punës së studiuesve dhe mbrojtësve të trashëgimisë orthodhokse, ndër të cilët veçanërisht përmendet Theofan Popa. Muzeu Kombëtar i Artit Mesjetar në Korçë, i vendosur fillimisht në ambientet e Katedrales "Burimi Jetëdhënës", prej vitit 2016 funksionon në një godinë moderne të ndërtuar sipas standardeve bashkëkohore.

Ekspozita "Ikonat e Shqipërisë – Thesaret e Muzeut Kombëtar të Artit Mesjetar" do të mbetet e hapur për publikun në Chambéry deri më 15 nëntor 2026.

UGO kishte raportuar mbi pak kohë më parë, kur u bë e ditur se ikonat shqiptare do të prezantoheshin për herë të parë para audiencës franceze.

Lexo gjithashtu