SHBA: Numri i personave pa përkatësi fetare arrin nivel rekord

Një grua duke mbajtur një libër. Fotografi: freepik

Numri i qytetarëve në Shtetet e Bashkuara të Amerikës që deklarojnë se nuk i përkasin asnjë feje ka arritur në një nivel rekord. Sipas një studimi të fundit të institutit Gallup-it, rreth 24% e amerikanëve deklarojnë se nuk kanë përkatësi fetare, përqindja më e lartë e regjistruar që nga viti 1948.

Të dhënat tregojnë gjithashtu një rënie të ndjeshme të rëndësisë që i jepet fesë në jetën e përditshme. Vetëm 47% e të anketuarve shprehen se feja është “shumë e rëndësishme” në jetën e tyre, ndërsa në vitet 1950–1960 kjo përqindje arrinte rreth 75%.

Dallimet janë veçanërisht të dukshme ndërmjet brezave. Tek të rinjtë e moshës 18 deri në 29 vjeç, rreth 35% deklarojnë se nuk kanë përkatësi fetare, ndërsa tek personat mbi 65 vjeç kjo përqindje është vetëm 14%.
Edhe pjesëmarrja në shërbesat fetare ka pësuar rënie të ndjeshme. Sipas studimit të Gallup-it, 57% e amerikanëve thonë se rrallë ose kurrë nuk marrin pjesë në shërbesat në kishë, ndërsa vetëm 31% deklarojnë se marrin pjesë rregullisht çdo javë.

Sociologët theksojnë se kjo prirje lidhet me ndryshimet kulturore dhe me faktin se brezat më të rinj kanë një lidhje më të dobët me institucionet fetare krahasuar me brezat e mëparshëm.

Lexo gjithashtu