KNFSH zhvilloi Forumin Ndërfetar në Berat

Foto nga Këshilli Ndërfetar i Shqipërisë

Këshilli Ndërfetar i Shqipërisë (KNFSH) zhvilloi më 31 tetor 2026, në Berat, Forumin Ndërfetar në kuadër të Konsultimeve Kombëtare mbi botëkuptimet e traditave fetare dhe lulëzimin e përbashkët shpirtëror. Sipas njoftimit të KNFSH-së, takimi mblodhi drejtues e përfaqësues të komuniteteve fetare, deputetë, përfaqësues të pushtetit vendor, intelektualë dhe anëtarë të Këshillit Ekzekutiv dhe të Departamenteve të Gruas e Rinisë.

Kryetari i KNFSH-së dhe Kryegjyshi Botëror i Bektashinjve, Dede Baba Edmond Brahimaj, theksoi se traditat fetare krijojnë hapësira mirëkuptimi kur përcjellin mëshirë, drejtësi, dashuri dhe përgjegjësi ndaj tjetrit. “Dialogu ndërfetar nuk na kërkon të jemi të njëjtë; na kërkon të dimë ta respektojmë njëri-tjetrin në ndryshimet tona dhe të bashkëpunojmë për të mirën e përbashkët”, u shpreh ai.

Sekretari i Përgjithshëm i KNFSH-së dhe President i Religions for Peace Europe, Prof. Genti Kruja, e vendosi takimin në vazhdimësi të Forumit Rajonal dhe Trajnimit të Trajnerëve të zhvilluar në korrik në Tiranë, me pjesëmarrës nga shtatë vende evropiane. Ai ngriti nevojën për hapa konkretë në mbështetje të të rinjve dhe familjeve në vështirësi, kundër gjuhës së urrejtjes dhe për forcimin e besimit mes njerëzve.

Mitropoliti i Beratit, Hirësi Asti, e përshkroi traditën ndërfetare të qytetit si një frymë vëllazërore që shkon përtej tolerancës dhe tha se çdo brez ka përgjegjësinë ta mbrojë atë. Myftiu i Qarkut Berat, Bilbil Talla, vlerësoi traditën e bashkëjetesës mes komuniteteve fetare. Dom Paolo Marasco, famullitar i Beratit, ndau kujtime nga miqësia me drejtuesit myslimanë dhe ortodoksë të qytetit dhe nga vizitat e ndërsjella gjatë festave.

Në diskutime folën kryetari i Bashkisë Kuçovë, Kreshnik Hajdari, deputetët Fadil Nasufi, Hatixhe Konomi dhe Zija Ismaili, si dhe Kasion Hasimetaj, kryetar i Partisë Demokratike, Dega Berat. Hajdari kërkoi më shumë bashkëpunim në terren dhe shprehu gatishmërinë për takime sensibilizuese me komunitetet fetare, veçanërisht për brezin e ri.

U ngritën gjithashtu çështje të lidhura me forcimin e familjes, përgjegjësinë prindërore, kthimin e pronave të komuniteteve fetare dhe konsultimin më të ngushtë mes institucioneve publike dhe bashkësive fetare. Forumi përcolli thirrjen që trashëgimia e bashkëjetesës të ushqehet përmes edukimit, marrëdhënieve njerëzore dhe veprimtarive të përbashkëta.

Nuk është hera e parë që qyteti i Beratit përmendet në kontekstin e jetës kishtare; kohët e fundit vëmendja ra mbi fjalët e Mitropolitit Asti për rolin e grave ortodokse në Kishë.

Lexo gjithashtu