Përfundoi Takimi i 5-të Ndërortodoks Murgëror në Lefkadhë

Foto: ilefkada.gr

Takimi i 5-të Ndërortodoks Murgjëror përfundoi të enjten, më 15 tetor, në Manastirin e Shenjtë Faneromeni të Lefkadës, me Liturgji Hierarkike dhe përkujtim për Kryepeshkopin e ndjerë të Shqipërisë, Anastasin. Sipas eeod.gr, dita e fundit u mbyll me katër kumtesa kushtuar murgjërisë dhe misionit.

Dita nisi me Liturgji Hierarkike në kishën qëndrore të manastirit, ku u kremtua edhe përkujtimi për shpirtin e Kryepeshkopit të Tiranës, Durrësit dhe gjithë Shqipërisë, Anastasit. Seanca e tetë e Sinaksit u zhvillua nën kryesinë e Mitropolitit të Artës, Kallinikut.

Fjalën e parë e mori Mitropoliti i Nafpaktit dhe Shën Vlashit, Jerotheu, i cili foli për lidhjen e Liturgjisë Hyjnore me misionin ortodoks. Ai tha se veprimtaria misionare e Kishës buron nga jeta e saj liturgjike dhe sakramentale. Për ta zhvilluar këtë qëndrim, iu referua mësimit e përvojës së Shën Sofronit, Shën Paisit dhe Shën Nektarit, si dhe mënyrës se si bashkësia e parë e krishterë e lidhte përhapjen e Ungjillit me Pagëzimin dhe Eukaristinë.

Më pas foli Gjerondisa Jakovi, Igumene e Manastirit të Akritohorit të Serres, me temë shërbesën e përditshme në manastir dhe kontributin e jetës murgërore në botën e sotme. Ajo e paraqiti murgërinë si rrugë përkushtimi të plotë ndaj Zotit, ku lutja, pendimi, bindja, përulësia dhe dashuria janë themelore. Sipas saj, largimi i murgut nga bota nuk do të thotë indiferencë ndaj njerëzve.

Kumtesa e tretë ishte e Protopresviterit Themistokli Hristodhulu, Doktor i Teologjisë. Ai theksoi se përhapja e besimit nuk është detyrë vetëm e atyre që shërbejnë në misione të organizuara, pasi çdo i krishterë mund ta përcjellë mesazhin e Ungjillit me qëndrimin dhe veprat e tij. Si shembull solli ngjarje nga jeta e asketëve të vjetër dhe foli edhe për filanthropinë murgërore.

Kumtesën e fundit e mbajti Arkimandriti Efremi, Igumen i Manastirit të Madh të Vatopedhit në Malin Athos, i cili foli për Kryepeshkopin Anastas dhe ndau kujtime personale. Ai tha se në fillim kishte rezerva për disa nga pikëpamjet e tij, por duke e njohur më mirë kuptoi se fjala dhe qëndrimi i tij mbështeteshin te dashuria, paqja dhe kultivimi shpirtëror. U ndal edhe te qasja e Kryepeshkopit ndaj Islamit, duke thënë se ai e trajtonte pa fanatizëm dhe me njohuri teologjike.

Pas kumtesave pati diskutim mes pjesëmarrësve dhe u paraqitën përfundimet e Takimit. Mbylljen zyrtare të punimeve e shpalli Mitropoliti i Lefkadhës dhe Ithakës, Theofili. Dita vazhdoi me drekë të përbashkët në sallën e manastirit, ndërsa pasdite pjesëmarrësit bënë një shëtitje pelegrine në disa vende të Lefkadhës.

Siç kishte raportuar UGO, 33-vjetori i ngjitjes në fron i Kryepeshkopit Anastas në Tiranë u kujtua edhe më herët në faqen tonë.

Lexo gjithashtu