Shën Nikolla Velimiroviç: Nuk mjafton vetëm besimi

Foto Ilustruese UGO

Sa më pak besim të kemi, aq më i madh është shqetësimi ynë. Një nga dobitë më të mëdha të besimit është çlirimi i njeriut nga shqetësimet e shumta. Për sa kohë fëmija e di se babai është aty dhe kujdeset për shtëpinë e për të gjitha punët e saj, çdo shqetësim i tij merr fund shpejt me një këngë. Por, sapo humbet kjo ndjesi, kënga hesht! Atëherë fëmija ndihet jetim dhe i vetëm, i rrethuar nga shqetësimet; ndihet sikur e ka rrethuar një tufë grerëzash. Sa më shumë njeriu përpiqet që, i vetëm dhe me fuqitë e veta, të «shkarkojë» shqetësimet e tij, aq më shumë ngatërrohet në rrjetat e tyre. Gëzimi shuhet, flokët zbardhen, trupi «avullon», zemërimi grumbullohet, derisa njeriu përfundon si një thes prej lëkure të tharë, i mbushur me zemërim dhe i kërrusur mbi varr…

***

E sheh veten të lumtur dhe madje pohon se lumturinë tënde e ke krijuar vetë, pa Perëndinë dhe pa njerëzit. Prandaj e hedh poshtë pikëpamjen që mbrojmë: se çdo njeri i detyrohet lutje Perëndisë dhe lëmoshë të afërmit të tij. «As lutje Perëndisë, as lëmoshë të afërmit», thua dhe me këtë prirje e konsideron veten të lumtur. Për mua është vërtet e pamundur ta mendoj lumturinë jashtë Perëndisë dhe njerëzve. Mendoj se as e ke prekur lumturinë, por i ngatërron dukuritë dhe e quan lumturi mbijetesën pa shqetësime. Ke grumbulluar shumë nga ato që mund të japë toka, je ngopur, ke pirë dhe mendon se nuk të nevojitet askush nga ata që të rrethojnë. Por dije, mbi të gjitha, se toka nuk i jep asgjë askujt pa urdhrin e Perëndisë. Dhe gjithçka që të ka dhënë, ta ka dhënë me urdhrin e Tij.

Një kuptim më i thellë na mëson se, në të vërtetë, nuk kemi asgjë tonën që të jetë e qëndrueshme në këtë botë. Gjithçka është e përkohshme dhe e marrë hua; vjen e ikën shpejt, si një vorbull. Shëndeti, forca, bukuria, prona, nderi, pushteti, njohuritë e gjera, talenti artistik — të gjitha dhuntitë janë dhurata. Dhe sprova me të cilën Krijuesi vë në provë njerëzit lidhet me besimin, mëshirën, respektin dhe çdo cilësi të mirë. Sprova synon të nxjerrë në pah dy gjëra: së pari, nëse njeriu e di nga i është dhënë çdo dhunti; së dyti, nëse i jep lavdi dhe falënderim Dhuruesit të saj.

Dëgjo këtë këshillë të frikshme të profetit të madh Jeremia, i cili thërret: «Jepini lavdi Zotit, Perëndisë suaj, përpara se të bjerë errësira» (Jeremia 13:16). Fillo edhe ti sa më shpejt ta lavdërosh Perëndinë dhe ta falënderosh, përpara se të bjerë errësira në jetën tënde. Sepse, kur të vijë errësira, vuajtjet, mundimi dhe sëmundja, rënia dhe çmenduria, çfarë do të bësh atëherë? Kujt do t’i lutesh? Dhe cili prej njerëzve do të të mëshirojë, kur ti nuk ke treguar asnjë grimë mëshire? Që në jetën tënde të mos bjerë një errësirë e tmerrshme dhe e rëndë, dëgjoji dhe kujtoji këto fjalë të shenjta të Biblës: «Zoti nuk do ta lërë të vdesë urie shpirtin e të drejtit, ndërsa jetën e të pabesëve do ta përmbysë».

Nga libri i Shën Nikolla Velimiroviçit «Nuk mjafton vetëm besimi».

Botimet «En Plo».

Në të njëjtin kontekst kishtar, UGO kishte shkruar edhe për Simbolin e Besimit, që pohon besimin në një Perëndi.

Lexo gjithashtu