Programi i katekizmit rifillon në Mitropolinë e Apollonisë dhe Fierit

Programi i katekizmit filloi edhe për këtë vit të ri kishtar me shërbesën e Ajazmës në disa zona të Mitropolisë së Apollonisë dhe Fierit, me bekimin e Mitropolitit Imzot Nikolla. Sipas njoftimit të Mitropolisë, takimet zhvillohen në Fier, Pojan, Seman, Roskovec, Sheqishte, Verri, Metaj, Libofshë, Agim, Ndërnenas, Marinëz dhe Mujalli.

Edukimi i krishterë mbetet një hapësirë ku fëmijët, të rinjtë dhe gratë mblidhen për ta njohur më thellë besimin. Këtë e bëjnë përmes mësimeve, bisedave, lutjes dhe veprimtarive të përbashkëta. Me këto takime Mitropolia synon të forcojë lidhjen me Kishën, me shenjtorët dhe me traditat, si dhe të ndërtojë një komunitet ku secili ndihet i mirëpritur dhe i dëgjuar.

Temat mësimore të këtij viti janë zgjedhur me "Komunitetin Eukaristik Lokal" në qendër. Pjesëmarrësit do të njihen më nga afër me rëndësinë e enorisë si unitet i pandarë besimtarësh. Do të njihen gjithashtu me jetën liturgjike të Kishës dhe me rëndësinë e pjesëmarrjes në adhurim.

Krahas katekizmit, gjatë këtij muaji u zhvilluan veprimtari të tjera. Një prej tyre ishte festimi i ditëlindjeve të fëmijëve me aftësi të veçanta në Qendrën "Horizont".

Rinia Ortodokse e Fierit organizoi më 19 shtator një pelegrinazh shpirtëror në zonën e Prespës dhe në qytetin e Korçës. Grupi i enorisë së Katedrales "Shën Gjergji" mori pjesë në Liturgjinë Hyjnore në Tiranë, në të kremten e Apostullit dhe Ungjilltarit Joan. Së bashku me besimtarë të tjerë, ata uruan Kryepeshkopin Joan për ditën e emrit.

Mitropolia thotë se vepra e saj vazhdon me të njëjtin përkushtim dhe i mirëpret të gjithë ata që dëshirojnë t'i bashkohen aktiviteteve.

UGO kishte raportuar edhe për vizitën e Rinisë Ortodokse të Fierit në kishat e Korçës dhe Prespës.

Lexo gjithashtu