Kampi II i Vajzave Adoleshente u zhvillua në Shijon të Elbasanit

Vajzat dhe orgnizatorët e kampit me Fortlumturinë e Tij Kryepiskopin Joan

Kampi II i Vajzave Adoleshente i Kishës Orthodhokse u zhvillua me sukses në datat 20–27 korrik, në Manastirin e Shën Joan Vladimirit në Shijon të Elbasanit. Sipas njoftimit të Kishës Orthodhokse Autoqefale të Shqipërisë, kampi u zhvillua me bekimin e Fortlumturisë së Tij, Kryepeshkopit të Tiranës, Durrësit dhe gjithë Shqipërisë, Joan, dhe nën koordinimin e Mitropolitit të Fierit, Hirësi Nikollës, dhe Episkopit të Amantias, Hirësi Ignatit.

Nën temën "Udhëtoj me Krishtin", 56 vajza nga qytete të ndryshme të vendit morën pjesë në një javë të pasur me lutje, Liturgji Hyjnore, studim biblik, katekizëm, aktivitete krijuese, lojëra, sfida, ekskursion dhe takime frymëzuese me hierarkë, klerikë, teologë dhe të ftuar nga Shqipëria dhe Greqia. Programi kombinoi jetën shpirtërore me momente krijimtarie dhe argëtimi për vajzat pjesëmarrëse.

Një moment i veçantë ishte vizita e Fortlumturisë së Tij Joanit, i cili bisedoi me vajzat mbi rëndësinë e Shkrimit të Shenjtë në jetën e të krishterit, si edhe mbolli një qiparis në ambientet e manastirit, si kujtim i këtij kampi. Një vend të rëndësishëm zuri edhe Misteri i Rrëfimit, ndërsa për herë të parë vajzat psalën Paraklisin e Shën Joan Vladimirit.

Përmes çdo aktiviteti, vajzat përjetuan gëzimin e jetës në Kishë, forcuan miqësitë, mësuan të bashkëpunojnë dhe hodhën hapa të rinj në udhëtimin e tyre me Krishtin. Organizatorët falënderuan Perëndinë dhe Kishën Orthodhokse Autoqefale të Shqipërisë për bekimin e këtij kampi, si edhe të gjithë ata që kontribuan në organizimin e tij.

Nuk është hera e parë që Manastiri i Shën Joan Vladimirit në Shijon bëhet qendër e aktiviteteve kishtare për të rinjtë; kohët e fundit vëmendja ra edhe mbi , kur i njëjti manastir u bë vendtakim për besimtarët e zonës.

Organizatorët e mbyllën njoftimin me shpresën për t'u takuar përsëri në kampet e ardhshme. Njoftimin e ka përgatitur Priftëreshë Juljana Kodheli.

Lexo gjithashtu