Arkondët kërkojnë mbrojtje për të krishterët e përndjekur në botë

Arkondët e Patriarkanës Ekumenike të Kostandinopojës kanë kërkuar që persekutimi i të krishterëve në botë të vendoset ndër përparësitë e institucioneve ndërkombëtare dhe organizatave për të drejtat e njeriut.

Në tekstin e publikuar nga Arkondët dhe të nënshkruar nga dr. Anthony J. Limberakis, Udhëheqës Kombëtar i Urdhrit të Shën Andreas, theksohet se liria fetare mbetet një nga fushat kryesore të misionit të tyre. Ndërhyrja u bë pas deklaratave të kryepeshkopit Ettore Balestrero, vëzhgues i përhershëm i Selisë së Shenjtë pranë Kombeve të Bashkuara.

Sipas Vatican News, Balestrero deklaroi në Gjenevë se pothuajse 400 milionë të krishterë në botë përballen me persekutim ose dhunë. Ai tha gjithashtu se gjatë vitit 2025 pothuajse 5.000 të krishterë u vranë për shkak të besimit të tyre.

Të dhënat e Open Doors World Watch List 2026 flasin për më shumë se 388 milionë të krishterë që përballen me nivele të larta persekutimi dhe diskriminimi për shkak të besimit. Sipas të njëjtit burim, në 50 vendet e listës, mbi 315 milionë të krishterë jetojnë në kushte persekutimi shumë të lartë ose ekstrem.

Në raport shënohet se 4.849 të krishterë u vranë gjatë periudhës së raportimit të listës 2026, ndërsa 4.712 u ndaluan dhe 3.632 kisha ose prona të krishtera u sulmuan. Vendet e para në listë janë Koreja e Veriut, Somalia, Jemeni, Sudani dhe Eritrea.

Në raportin ndërkombëtar të Open Doors përmendet në veçanti dhuna në Afrikën nën-Sahariane. Sipas raportit, nga 4.849 të krishterët e vrarë në periudhën e raportimit, 3.490 ishin në Nigeri.

Arkondët theksojnë se këto të dhëna kërkojnë reagim të vazhdueshëm nga bashkësia ndërkombëtare. Në deklaratën e tyre, ata bëjnë thirrje për mbrojtjen e lirisë fetare dhe për lutje të pandërprerë për të gjithë ata që vuajnë për shkak të besimit të krishterë.

Burimi: Archons of the Ecumenical Patriarchate, Vatican News, Open Doors

Lexo gjithashtu