Kryepiskopi Joan drejtoi meshën në Kishën e Shën Pavlit në Rrushkull

Kryepiskopi Joan gjatë Shërbesës së Mëngjesores, Foto Radio Ngjallja

Kryeapostujt Shën Pjetër dhe Shën Pavël u kremtuan të hënën, më 29 qershor 2026, me Liturgji Hyjnore në kishën e Shën Pavlit në fshatin Rrushkull të Durrësit. Kjo ishte hera e parë që Kryepiskopi Joan meshoi në këtë kishë, i shoqëruar nga klerikë të Kryepiskopatës dhe në praninë e besimtarëve të shumtë, sipas Radio Ngjallja.

Në fjalën e tij të mbajtur gjatë kremtimit, Kryepiskopi Joan u ndal gjerësisht te jeta dhe mesazhi shpirtëror i dy Apostujve. Ai theksoi se jetët e shenjtorëve nuk lexohen si biografi të thjeshta, por si mësim dhe përjetim i përbashkët: "Ashtu si ikona nuk është thjesht një portret, por diçka që e kapërcen atë, duke u bërë një dritare për të komunikuar me dimensionin tjetër, po kështu janë edhe jetët e shenjtorëve." Kryepiskopi nënvizoi se Shën Pjetri dhe Shën Pavli, ndonëse njerëz krejtësisht të ndryshëm — njëri peshkatar i pashkolluar, tjetri intelektual i formuar — mishëronin unitetin në diversitet që karakterizon Kishën.

Kryepiskopi Joan u ndal veçanërisht te tema e pendimit dhe e restaurimit shpirtëror, duke sjellë shembullin e mohimit dhe të pendimit të thellë të Shën Pjetrit, si dhe shndërrimin e Shën Pavlit nga përndjekës i Kishës në "enë të zgjedhur të Krishtit". "Nëse nuk kemi dashuri për Zotin, nuk do të kemi as dashuri për njerëzit," tha ai, duke e lidhur këtë mesazh me realitetin shoqëror bashkëkohor.

Gjatë predikimit, Kryepiskopi rikujtoi gjithashtu lidhjen historike të Kishës së Durrësit me Apostullin Pavël, duke theksuar se tradita e lashtë e Kishës dëshmon se vetë Shën Pavli e themeloi Kishën e Durrësit, duke vendosur si peshkop të parë Shën Qesarin. Në fund të Liturgjisë Hyjnore u krye edhe litania e ikonës së Shenjtorit. Kryepiskopi Joan i falënderoi besimtarët dhe u lut për Kishën shqiptare, për klerikët e saj dhe për Kryepeshkopin Anastas, si dhe për bekimin e vendit dhe të familjeve të pranishme.

Nuk është hera e parë që Kryepiskopi Joan viziton strukturat kishtare të Durrësit; kohët e fundit vëmendja ra mbi takimin e tij me klerikët e Kryepeshkopatës në të njëjtin qytet.

Fotoalbum nga Radio Ngjallja:

Lexo gjithashtu